Зумерлар норозилиги Перуга етди

Перу давлатида Z авлоди (зумерлар) ёшлари иштирокида йирик норозилик намойишлари бўлиб ўтмоқда. Намойишлар чоғида юзлаб инсон жароҳат олган, бир киши ҳалок бўлган. Норозилар яқинда лавозимга келган президентнинг истеъфосини талаб қилмоқда.

Норозиликлар бир ой аввал ёшлар учун пенсия ва маошларни ошириш талабидан бошланган эди. Кейинчалик уларнинг кўлами кенгайиб, Перу аҳолисининг жиноятчилик, коррупция ва ҳукуматнинг фаолиятидан норозилигини ифода эта бошлади.

Норозилар полиция томонига фейерверклар отган, полиция эса кўздан ёш оқизувчи газ ва резина ўқлар билан жавоб берган.

Натижада тахминан 100 киши жароҳат олган, уларнинг 80 нафари полиция ходимлари, 10 нафари журналистлар эканлиги маълум қилинди.

Бундан ташқари, намойиш иштирокчиларидан бири ўқ отилиши натижасида ҳалок бўлган. Ҳукумат бу воқеа бўйича тергов бошланганини маълум қилди.

Президент Хосе Жери ва унинг ҳукуматига қарши танқидлар дарҳол кучайди. Сабаби, унга нисбатан аввалроқ бир аёлга нисбатан зўрлашда айблов қўйилган эди. Август ойида прокуратура ишни ёпган, аммо шу куни унинг ёнида бўлган бошқа шахсга нисбатан тергов ҳали ҳам давом этмоқда.

Норозилар шунингдек, президентни қонун чиқарувчи бўлган пайтида жиноятчиликка қарши курашни сусайтирадиган олти қонун учун овоз бергани учун ҳам айблашди.

Намойишчилар президент ва парламент аъзоларининг истеъфосини, шунингдек, улар “жиноий гуруҳлар фаоллигини кучайтираётган” деб ҳисоблаган қонунларни бекор қилишни талаб қилишди.

10 октябрь куни лавозимга киришган президент Хосе Жери зумерлар норозиликларидан кейин ҳам истеъфога чиқишни рад этди.

Шу билан бирга, у норозилик вақтида ҳалок бўлган иштирокчи учун қайғуда эканлигини билдирди:

“Менинг бурчим – мамлакат барқарорлигини сақлаб қолиш. Бу – менинг масъулиятим ва вазифам”, — деди Жери Перу парламентига ташрифидан сўнг маҳаллий ОАВга берган баёнотида.

Шу билан бир вақтда, Reuters агентлиги маълумотларига кўра, Перу бош вазири Эрнесто Альварес пойтахт Лима шаҳрида фавқулодда ҳолат эълон қилиниши ва ҳукумат жиноятчилик ўсишига қарши курашиш бўйича махсус чоралар тайёрлаётганини маълум қилган.