Трамп Зеленскийни ҳақорат қилди

Британия матбуоти Оқ уйда юз берган жиддий можаро ҳақида маълум қилди. Financial Times нашри ёзишича, АҚШ президенти Доналд Трамп Украина раҳбари Владимир Зеленский билан учрашув пайтида асабий ҳолатга тушиб, столдаги хариталарни ерга ирғитган ва ҳақоратли сўзлар ишлатган. Манбаларнинг таъкидлашича, Трамп суҳбат давомида Путиннинг фикрларини такрорлаган ва Зеленскийга: “Путиннинг шартларини қабул қил, акс ҳолда мамлакатинг йўқолади”, — деган.

Financial Times маълумотига кўра, Трамп Оқ уйда бўлиб ўтган учрашувда Россия президенти Владимир Путиннинг фикрларини “деярли сўзма-сўз” такрорлаган. Европалик манбаларнинг хабарига кўра, Зеленский жанг майдонидаги ҳолатни кўрсатувчи хариталарни столга қўйганида, Трамп уларни ирғитиб юборган ва: “Бу харитага қайта-қайта қарашдан чарчадим”, — деган.

Трамп суҳбатнинг катта қисмини Зеленскийга маслаҳат бергандек тарзда ўтказган ва Путиннинг нуқтаи назарини тез-тез такрорлаб турган. У ҳатто Путиннинг “бу уруш эмас, махсус операция” деган иборасини келтириб, Украина келишувга бормаса, “мамлакати йўқолиш арафасида”, деб айтган.

Манбаларга кўра, Трамп Зеленскийдан Донбасс минтақасини тўлиқ равишда Путинга топширишни сўраган. Бироқ у Reuters саволига жавоб бериб, бу ҳақдаги айбловларни рад этган.

Зеленский учрашувга Украинадаги фронт чизиқларини акс эттирувчи хариталар билан келган. Financial Times ёзишича, Трамп хариталарни ирғитиб, “Бу қизил чизиқ қаерда — билмайман. У ерда ҳеч қачон бўлганим йўқ”, — деган.

Трамп, шунингдек, Украина ва Россияга хавфсизлик кафолатлари беришни таклиф этган. Манбаларнинг сўзларига кўра, икки лидер ўртасидаги суҳбат баъзи паллаларда кескин тортишувларга айланган — Трамп бир неча бор ҳақоратли сўзлар айтган, Зеленский эса Путинга ишониб бўлмаслигини таъкидлаган.

Трампнинг Зеленскийга: “Путиннинг шартларини қабул қил, акс ҳолда мамлакатинг йўқолади”, — дегани энг катта шов-шувга сабаб бўлди.

Шу билан бирга, АҚШ президенти сўнгги ҳафталарда Путиндан сабр-тоқати тугаганини ва Украинага ёрдам бериш масаласида фаолроқ бўлиш ниятини билдирган эди. Бироқ бу учрашувда у яна Россияга яқин риторика билан чиқиш қилгани эътиборни тортди.

Манбаларга кўра, Трамп Зеленскийга: “Турган жойингда тур, ҳар ким ўз ғалабасини эълон қилсин”, — деб таклиф билдирган, яъни урушни ҳозирги фронт чизиғида музлатиб қўйишни таклиф этган.

Учрашувдан сўнг Зеленский матбуотга берган баёнотида Трампнинг тинчлик чақирувига эҳтиёткорона муносабат билдирди.

“Путин тинчликни хоҳламайди”, — деди Зеленский ва Трампнинг ижтимоий тармоқдаги баёнотини изоҳлар экан: “Президент ҳақ — ҳозирги вазиятни барқарорлаштириб, кейин музокара қилишимиз керак”, — деб айтди.