Германияда ҳарбийлар ва полиция ўртасида тўқнашув содир бўлди

Германияда машғулот ўтказаётган немис армияси аскарлари ҳақида хабар берилганидан сўнг воқеа жойига етиб келган полицияни машғулотнинг бир қисми деб ўйлаб, ўқув патронлари билан ўқ узган аскарларга ҳақиқий патронлар билан жавоб қайтарди. Ҳодиса оқибатида 1 нафар аскар яраланди. Германия матбуотининг ёзишича, хабар асосида етиб келган полиция экипажлари машғулотдан бехабар бўлган.

Германиянинг Мюнхен шаҳри шимоли-шарқида жойлашган Алтенединг ҳудудида ўтказилган "Маршал Кучи 2025" машғулотида катта фожианинг олди олинди.

Машғулотнинг бир қисми сифатида жамоат жойида машқ қилаётган аскарлар ферманинг молхонаси атрофида жойлашган пайтда, уларни кўрган аҳоли томонидан полицияга хабар берилган.

Хабар асосида ҳудудга кўплаб полиция ходимлари юборилди. Полициянинг келганини кўрган машғулотдаги аскарлар буни ўз машғулотларининг бир қисми деб ўйлаб, ўқув патронлари билан "душман кучи"га қарата ўт очди.

Бунинг ортидан полиция экипажлари машғулот ўтказаётган аскарларга ҳақиқий ўқлар билан жавоб қайтарди. Ақл бовар қилмас ҳодисада машғулотдаги аскарлардан бири енгил тан жароҳати олди. Ҳаётига хавф туғилмаган аскар шифохонада даволанмоқда.

Тахминан 800 нафар аскар, ўт ўчириш ва қутқарув гуруҳлари иштирок этган машғулотда юз берган ҳодиса юзасидан расмий баёнот берилмаган бўлса-да, Германия матбуоти ватандошнинг хабари асосида ҳудудга келган полиция экипажлари машғулотдан хабари бўлмаганини маълум қилди.

Машғулот сценарийси эса НАТОга аъзо давлат босиб олинган тақдирда, иттифоқ кучлари билан ҳарбий ва жамоат тузилмаларининг биргаликда ҳаракат қилиш қобилиятини ривожлантиришга қаратилганлиги хабар қилинган.