Туркий дунёни бирлаштирган Хўжа Насриддин

Туркия билан бир қаторда Озарбайжон, Ўзбекистон, Қирғизистон ва Қозоғистон томонидан қўллаб-қувватланаётган "Хўжа Насриддин" фильмининг суратга олиш ишлари давом этмоқда. Асар кейинги йил томошабинларга тақдим этилади.

Туркий дунёнинг бешта давлати тарихда илк бор бир фильмни биргаликда амалга оширмоқда. Озарбайжоннинг моҳир кино усталаридан Вагиф Мустафаев сценарийсини ёзган ва режиссёрлигини ўз зиммасига олган "Хўжа Насриддин: Қийин кунларимнинг дўсти" номли фильм учун "Мотор!" дейилди. Халқаро Турк Маданияти Ташкилоти (ТУРКСОЙ) доирасида тайёрланаётган асарнинг Туркиядаги суратга олиш жараёнлари шу кунларда якунланди. 10 кун давом этган суратга олиш ишлари Денизлидаги Помуққалъанинг тарихий жойларида, шунингдек, Истанбулда ўтказилди.

Лойиҳага Туркиядан Маданият ва туризм вазирлиги Кинематография Бош дирекциясидан ташқари Озарбайжон, Ўзбекистон, Қирғизистон ва Қозоғистоннинг давлат муассасалари кўмак бермоқда.

Режиссёр Мустафаев суратга олиш ишлари кўнгилдагидек олиб борилаётганини ва туркий дунёнинг умумий қаҳрамони Хўжа Насриддинни реалистик тарзда бугунги кунга етказишни исташларини айтмоқда. Мустафаев: "Илк бор бешта туркий давлат битта фильм учун бирлашмоқда. Туркий дунё маданияти барчамизнинг умумий қаҳрамонимиз Хўжа Насриддин атрофида бирлашяпти. Бундан каттароқ воқеа бўлиши мумкинми?" дея таъкидлайди.

Моҳир режиссёр асар таркибига туркий дунёнинг турли мамлакатларидан актёрларни жалб қилганларини ҳам айтмоқда. Хўжа Насриддин ролини қозоғистонлик актёр Сағизбой Қарабалин ижро этаётган бўлса, Туркиядан актёр Эмир Демирчи ёш Иброҳим роли билан унга ҳамроҳлик қилмоқда. Озарбайжондан Шоҳин Насиров, Қирғизистондан эса Таалайкан Абазова фильмнинг актёрлар таркибидан жой олган.

Қизиқиш билан кутилаётган фильм лойиҳасининг Қирғизистон ва Озарбайжондаги суратга олиш ишлари ўтган ойларда тугалланган эди. Лойиҳанинг кейинги манзиллари эса Ўзбекистон ва Қозоғистон бўлади. Суратга олиш ишлари жорий йил охиригача якунланиши кутилаётган асарни 2026 йилнинг апрель ойида тайёр ҳолга келтириш ва сўнгра 5 та мамлакатда томошабинларга тақдим этиш режалаштирилган.