АҚШда юк самолёти ҳалокатга учради

АҚШнинг Кентукки штатида юк самолётининг парвоздан кўп ўтмай қулаши натижасида содир бўлган ҳалокатда қурбонлар сони камида 12 кишига етди. Кентукки штати губернатори Энди Бешир ҳалок бўлганлардан бири бола эканлигини эълон қилди.

АҚШнинг Кентукки штатида юк самолётининг парвоздан қисқа вақт ўтгач қулаши натижасида ҳалок бўлганлар сони ортди. Луисвилл шаҳри мэри Крейг Гринберг ўзининг ижтимоий тармоқдаги саҳифасида қурбонлар сони камида 12 нафарга етганини айтиб: "Ҳали ҳам йўқолганлар борлигини эълон қилишдан жуда қайғудаман", деган сўзларни ишлатди.

Ҳеч ким бу фожиага ёлғиз қарши турмаслиги кераклигини таъкидлаган Гринберг: "Биз бу юракни парчалайдиган воқеадан жабр кўрган барчага ёрдам ва кўмак беришни давом эттирамиз", деди.

Бугун Кентукки губернатори Энди Бешир ва АҚШ Вакиллар палатаси аъзоси Морган МакГарви билан ҳалокат жойини зиёрат қилганларини айтган Гринберг: "Кўрган манзарамиз вайронкор эди", дея баҳо берди. Гринберг ҳалокат сабабларини аниқлаш учун маҳаллий ва штат даражасидаги барча ҳукумат идоралари билан ҳамкорликни давом эттиришларини таъкидлади.

Кентукки губернатори Энди Бешир эса ижтимоий тармоқдаги саҳифасида ҳалок бўлганлардан бири бола эканлигини айтиб: "Кечаги ўлимга олиб келган авиаҳалокат келтирган вайронгарчиликни тарифлаш имконсиз. Юрагим парчаланди", деди. Ҳалокатдан жабр кўрган барчанинг ёнида эканлигини ва жабрланувчилар учун дуо қилаётганини қайд этган Бешир: "Буни биргаликда енгиб ўтамиз", деди.

АҚШ Миллий Транспорт Хавфсизлиги Кенгаши (NTSB) аъзоси Тодд Инман ҳам журналистларга берган баёнотида, тергов гуруҳи парвоз пайтида самолётнинг чап двигатели қанотдан ажралганини кўрсатувчи аэропорт тасвирларини қўлга киритганини айтди. Самолётнинг чап двигатели парвоз пайтида аэропорт учиш-қўниш йўлагида қолгани аниқланганини билдирган Инман, "қора қути" номи билан танилган маълумотларни ёзиб олиш ва учувчилар кабинаси овоз ёзиш мосламалари топилганини ва таҳлил учун Вашингтонга юборилишини ҳам қўшимча қилди.

Ичида 3 нафар экипаж аъзоси бўлган "UPS" фирмасига тегишли "McDonnell Douglas MD-11" русумли юк самолёти кеча АҚШнинг Кентукки штатидаги Луисвилл Халқаро Аэропортидан парвоз қилгандан қисқа вақт ўтгач қулаган эди. UPS охирги марта 2013 йил август ойида Алабама штатининг Бирмингем шаҳридаги халқаро аэропортга қўнаётган "Airbus" русумли юк самолётининг қулаши билан кун тартибига келган эди. Ўша ҳалокатда ҳам 2 нафар экипаж аъзоси ҳалок бўлган эди.