Трамп Киевни танқид қилди

АҚШ президенти Дональд Трамп Украинадаги урушни Жо Байден маъмуриятидан мерос қолган муаммо сифатида кўрсатиб, масъулиятни собиқ президент Жо Байденнинг бўйнига юклади. Шунингдек, у Украина президенти Владимир Зеленский АҚШнинг саъй-ҳаракатлари учун лозим даражада миннатдорчилик изҳор этмаётганини даъво қилди.

АҚШ президенти Дональд Трамп миллионлаб инсон ҳалок бўлган Украинадаги урушни собиқ АҚШ президенти Жо Байден маъмуриятидан қолган мерос эканини билдириб, Украина раҳбарияти ҳам АҚШнинг саъй-ҳаракатлари учун етарлича миннатдорлик билдирмаётганини таъкидлади.

Трамп АҚШда жойлашган Truth Social ижтимоий тармоқдаги шахсий саҳифасида пост қолдирди.

"Агар АҚШ ва Украинада кучли ва салоҳиятли раҳбарият бўлганида, Россия ва Украина ўртасидаги уруш ҳеч қачон содир бўлмасди" деган Трамп, мазкур уруш учун собиқ президент Жо Байденни айблади.

Трамп: "Мен ҳеч қачон юзага келмаслиги керак бўлган, ҳамма мағлубиятга учраётган, айниқса миллионлаб одамлар бекордан-бекорга ҳалок бўлган урушни мерос қилиб олдим" деди ва "Украина раҳбарияти бизнинг саъй-ҳаракатларимиз учун ҳеч қандай миннатдорчилик туйғусини изҳор этмади" ибораларини қўллади.

Европанинг ҳам Россиядан нефть сотиб олишда давом этаётганига ишора қилган Трамп: "АҚШ Украинага тарқатиш учун НАТОга катта миқдорда қурол сотишда давом этмоқда. Ноқобил Байден катта миқдордаги маблағларни ҳам қўшиб, ҳамма нарсани текинга бераверди" дея баҳо берди.

Дональд Трамп маъмурияти томонидан тайёрланган 28 моддали тинчлик режаси таклифи Киевга тақдим этилган эди.

Россия президенти Владимир Путин режани муҳокама қилишга тайёр эканлигини билдириб, "Ўйлайманки, бу режа якуний тинчлик келишувига асос бўлиши мумкин" ифодасини қўллади.

Украина президенти Владимир Зеленский ҳам АҚШ урушга нуқта қўйиши мумкин бўлган "тинчлик режаси" устида ишлаётганини қайд этган ва мамлакати ўз миллий манфаатларига "ҳеч қачон хиёнат қилмаслигини" айтган.