Қотил 10 йил АҚШга хизмат қилган

Оқ уй яқинида икки Миллий гвардиячини ўлдирган қотил АМР МРБ ва АҚШ махсус кучларининг қўшма тузилмаси — "Қандаҳор ҳужум кучи" аъзоси бўлиб чиқди.

АҚШ президенти Дональд Трамп "террорчилик ҳаракати" деб атаган, 20 ёшли Сара Бекстром ва 24 ёшли Эндрю Вольфнинг ўлими турли мунозараларга сабаб бўлди.

Раҳмануллоҳ Лаканвал исмли ҳужумчи 2021 йилгача АМР МРБ билан боғлиқ бўлган "Қандаҳор қўшма ҳужум кучи" таркибида ҳарбий бўлгани аниқланди. АҚШ қўшинларининг Афғонистондан чиқарилиши билан Вашингтонга келтирилган Лаканвал учун ҳужумдан бир неча соат олдин махсус қидирув эълон қилинган.

Мутахассислар бу ҳодиса оддий муҳожир ҳаракати эмас, балки минтақавий сиёсат билан яқиндан боғлиқ эканлигини ва ортида бошқа режалар ётганини билдиришди.

Афғонистон-Покистон ҳудудида узоқ йиллар ишлаган тадқиқотчи Меҳмет Ўзтурк бу ҳодиса минтақавий вазиятдан ажралмаган ҳолда кўрилиши кераклигини таъкидлади.

Оқ уйга бир неча метр узоқликда содир бўлган бу иккинчи шундай воқеа эканлигини айтган Ўзтурк: "Бундан аввал бошқа бир афғон ҳам шунга ўхшаш воқеага аралашганди. Маълум бўлишича, бу шахс 2021 йилда Байден маъмуриятининг қарори билан амалга оширилган қўшинларни олиб чиқиш пайтида АҚШга келган. Энг муҳими, ҳужумчи Раҳмануллоҳ Лаканвал аввал "Қандаҳор ҳужум кучи" аъзоси бўлган. Яъни, у 10 йил АҚШ ҳукуматига хизмат қилган. Афғонистонда бундай афғонлар Америка томонидан "кўк карта" олгани учун "Кўклар" деб аталишарди. Толибон афв эълон қилганига қарамай, улар АҚШга қочиб кетишган. Лаканвал ҳам ўша учоқдагилардан бири. Ҳужумнинг Трамп маъмуриятининг афғонларни қайтариш сиёсатига алоқаси бўлиши мумкин. Лекин бу ҳодиса минтақавий лойиҳалардан ташқарида эмаслигини билишимиз керак", деди.

Сиёсатшунос Тарлан Айвазов эса АҚШ маъмурияти янги бир "11 сентябрь" излаётганини таъкидлади.

Айвазов айниқса Исроил АҚШни минтақада кўпроқ ушлаб туришга интилаётганини қайд этди: "Ҳужумчи Американинг рўйхатдан ўтган норасмий ҳарбий гуруҳи аъзоси. Кўпчилик Лаканвал "бизни ишлатиб ташладингиз, шунга исён" қилди деб ўйлаши мумкин, аммо сценарий бошқача. Бу воқеани Исроилнинг қатлиомлари, босқинлари, Эронга ҳужуми, Суриядаги ҳаракатлари ва янги энергетика йўлаги режалари каби минтақавий лойиҳалардан алоҳида кўрмаслик керак. Тель-Авив АҚШнинг Афғонистонга қайтишини қатъий истайди. Трампнинг Баграм авиабазаси орқали Афғонистонга қайтиш ҳақидаги сўнгги баёнотлари бунинг далили. Нетаняху маъмурияти АҚШ ўзига кўпроқ ҳарбий ёрдам беришини хоҳлайди. Афғонистонда ҳали ҳам Америка разведкасининг ўнлаб яширин гуруҳлари бор. Покистон-Афғонистон кескинлиги ҳам шу лойиҳанинг бир қисми эканлигини билишимиз лозим".

Пуштун аслли Лаканвалнинг 2025 йил апрель ойида бошпана сўрови тасдиқлангани ва у АҚШда қонуний яшагани хабар қилинмоқда.