Россия ва АҚШ Украина тинчлик режаси бўйича муросага келмади

АҚШ ва Россия Украина учун Америка тинчлик режасида ҳудудий масала бўйича ҳали муросага кела олмади.

Бу ҳақда Россия президенти Владимир Путиннинг Трампнинг махсус вакили Стив Уиткофф ва АҚШ президенти Дональд Трампнинг куёви Жаред Кушнер билан музокараларидан сўнг Россия етакчисининг ёрдамчиси Юрий Ушаков маълум қилди.

У ҳудудий масалани Россия Федерацияси учун энг муҳим деб атади.

"Муросали вариант топилмади, аммо баъзи Америка таклифлари кам ёки кўп мақбул кўринмоқда. Бироқ, уларни муҳокама қилиш керак", деди у.

Ушаков АҚШнинг баъзи иборалари Россияга тўғри келмаслигини ҳам қайд этди.

Президент ёрдамчиси айнан қайси ҳудудий таклифлар ҳақида гап кетганига аниқлик киритмади. Унинг сўзларига кўра, Путиннинг Уиткофф билан учрашувида АҚШ тинчлик режасининг аниқ иборалари муҳокама қилинмаган, иштирокчилар моҳият ҳақида гаплашганлар.

Ушаковнинг таъкидлашича, Россия "нимагадир рози бўлишга тайёр", аммо "танқидга сабаб бўлган" жиҳатлар ҳам бор. Шу билан бирга, хулоса қилиб, у "фойдали муҳокама" бўлиб ўтганини тушунтирди.

Нашрнинг аниқлик киритишича, Кремлдаги музокаралар беш соатга яқин давом этган.

Украина президенти Владимир Зеленский бир кун аввал Украина Америка делегациясининг Россиядаги учрашувларидан сўнг улардан хабар кутаётганини айтганди.

У режанинг барча тафсилотларини ошкор қила олмаслигини таъкидлаб, учта асосий, "энг сезувчан" мавзуни белгилаб берди. Улар орасида — ҳудудлар масаласи, ечими Европа ҳамкорлари томонидан қабул қилиниши керак бўлган музлатилган Россия активларидан фойдаланиш, шунингдек, "хоҳиш билдирганлар коалицияси" доирасида АҚШ, Европа ва бошқа давлатлардан Украина учун хавфсизлик кафолатлари бор.

Зеленский аввалроқ Уиткофф ва унинг жамоаси билан гаплашганини айтди ва Киев кейинги алоқаларга, шу жумладан Украина ҳудудида учрашув ўтказишга ҳам тайёрлигини қайд этди.