Ҳарбий тўнтариш муваффақиятсиз тугади

Бенинда ҳокимиятни эгаллаганини эълон қилган ҳарбий гуруҳнинг ҳаракати қисқа муддатда бостирилди. Президент Патрис Талон хавфсизлик тўлиқ таъминланганини эълон қилиб, халқни хотиржамликка чақирди.

Бенин Президенти Патрис Талон мамлакатда эрталаб содир бўлган давлат тўнтаришига уриниш хавфсизлик кучлари томонидан бартараф этилганини маълум қилди.

Давлат телевидениесида сўзга чиққан Талон, мамлакат "ўта танқидий вазиятдан ўтганини" таъкидлаб, бир гуруҳ ҳарбийлар ҳокимиятга қарши исён кўтарганини билдирди. У ҳаракат қисқа муддатда бостирилганини айтиб, бунга алоқадор шахслар қонун олдида жавоб беришини қайд этди.

Талон хавфсизлик тўлиқ таъминланганини ва жамоат тартиби нормал ҳолатга қайтганини таъкидлаб, ватандошларни кундалик турмушларини давом эттиришга чақирди.

Куннинг аввалида "Қайта Тиклаш Ҳарбий Қўмитаси" номидан фойдаланган бир гуруҳ ҳарбийлар ҳокимиятни эгаллаганликларини даъво қилишган эди. Ички ишлар вазири Алассане Сейду ҳам ижтимоий тармоқлар орқали берган баёнотида исён муваффақиятсиз тугаганини эълон қилганди.