Венесуэла қамал қилинди

АҚШ ва Венесуэла ўртасидаги алоқалар тобора кескинлашмоқда. АҚШ Президенти Дональд Трамп Венесуэла Жанубий Америка тарихидаги энг йирик ҳарбий денгиз флоти томонидан тўлиқ қамал қилинганини ва Венесуэла режимини "хорижий террорчи ташкилот" деб эълон қилганини билдирди.

АҚШ Президенти Дональд Трамп Truth ижтимоий тармоғи орқали Венесуэла билан боғлиқ кескинлик юзасидан баёнотлар берди. Венесуэла Жанубий Америка тарихида шу пайтгача кўрилган энг йирик флот томонидан ўраб олинганини таъкидлаган Трамп шундай деди:

"Бу қамал янада кенгаяди ва уларга бериладиган шок илгари кўрганларининг ҳеч бирига ўхшамайди. Бу токи улар биздан илгари ўғирлаган барча нефть, ер ва бошқа активларни АҚШга қайтармагунча давом этади".

Николас Мадуро режимини "ноқонуний" деб атаган Трамп, ўғирланган нефть конларидан олинган маблағлар наркотерроризм, одам савдоси, қотиллик ва одам ўғирлаш каби фаолиятларни қўллаб-қувватлашга сарфланаётганини даъво қилди.

Трамп ўз қарорини қуйидагича изоҳлади: "Активларимиз ўғирланиши, терроризм, наркотрафик ва одам савдоси каби кўплаб сабабларга кўра Венесуэла режими 'хорижий террорчи ташкилот' сифатида таснифланди. Шу боис, бугун мен Венесуэлага кирадиган ва у ердан чиқадиган барча санкция остидаги нефть танкерларига нисбатан тўлиқ ва ҳар томонлама қамал қилиш (блокада) тўғрисида буйруқ бераман".

Мадуро режими Жо Байден маъмурияти даврида АҚШга юборган ноқонуний мигрантлар ва жиноятчилар ҳам тезлик билан Венесуэлага қайтарилаётганини таъкидлаган Трамп, ўз сўзини шундай якунлади:

"Америка жиноятчилар, террорчилар ёки бошқа давлатларнинг миллатимизни талашига, таҳдид қилишига ёки зарар етказишига йўл қўймайди. Шунингдек, душман режимнинг нефтимизни, еримизни ёки бошқа бирор активларимизни тортиб олишига ижозат бермайди. Ушбу активларнинг барчаси зудлик билан АҚШга қайтарилиши шарт".