Трамп Грин-карта (Green Card) ўйинларини тўхтатди

АҚШ Президенти Дональд Трамп, Браун университетида икки киши ҳалок бўлган қуролли ҳужумдан сўнг, ҳужумчининг илгари шу йўл билан АҚШга киргани маълум бўлгач, «Грин-карта» (Green Card) сифатида танилган АҚШ Турфа хиллик визаси (DV) дастурини тўхтатиб қўйди. Ички хавфсизлик вазирлиги дастурни зудлик билан тўхтатиш бўйича USCIS’га (АҚШ Фуқаролик ва иммиграция хизматлари) кўрсатма берилганини эълон қилди. Ушбу қарор аризалар бошланиши кутилаётган бир даврда ноаниқликка сабаб бўлди.

АҚШ Президенти Дональд Трамп, Род-Айленд штатидаги Браун университетида содир бўлган қуролли ҳужумдан сўнг, жамоатчилик орасида «Грин-карта» номи билан машҳур бўлган «АҚШ Турфа хиллик визаси» (DV) дастурини тўхтатиш бўйича топшириқ берди. Бу қарор АҚШда қонуний яшаш ҳуқуқини таъминловчи ушбу дастурнинг келажаги борасидаги баҳс-мунозараларни қайтадан алангалатди.

АҚШ Ички хавфсизлик вазири Кристи Ноэм, Трампнинг топшириғига биноан «DV1» номи билан ҳам танилган «АҚШ Турфа хиллик визаси» дастурини тўхтатиш учун зарур чоралар кўрилганини эълон қилди. Ноэм АҚШ Фуқаролик ва иммиграция хизматларига (USCIS) дастурни зудлик билан тўхтатиш ҳақида кўрсатма берилганини маълум қилди.

Ушбу баёнот, Грин-карта учун аризалар одатдаги шароитда октябрь ойида бошланиши керак бўлган даврда эълон қилинди. Аризалар бошланиши кечикаётгани сабабли миллионлаб одамлар жараённи интизорлик билан кутаётган бир вақтда қабул қилинган бу қарор номзодлар орасида ноаниқлик ва хавотирга йўл очди.

Ички хавфсизлик вазири Ноэм қарорнинг сабаби сифатида 13 декабрь куни Браун университетида содир бўлган ва икки кишининг ҳаётига зомин бўлган қуролли ҳужумни кўрсатди. Ҳужумчи Клаудио Мануэл Невеш Валенте 2017 йилда DV1 дастури орқали АҚШга кириб, Грин-карта олгани ҳақидаги маълумот бўлишилди.

Вазир Ноэм ўзининг ижтимоий тармоқдаги саҳифасида: «Бу разил кимсанинг мамлакатимизга киришига ҳеч қачон йўл қўйилмаслиги керак эди», — дея таъкидлади. Трампнинг аввал ҳам шунга ўхшаш сабаблар билан дастурни бекор қилиш учун курашганини эслатган Ноэм, Турфа хиллик визаси (DV) дастури миллий хавфсизлик нуқтаи назаридан хавф туғдиришини даъво қилди.

Баёнотда қайд этилишича, Президент Трампнинг топшириғи билан «ушбу ҳалокатли дастурдан бошқа Америка фуқаролари зарар кўрмаслиги» мақсадида DV1 дастурини зудлик билан тўхтатиш қарори қабул қилинган. Дастурнинг келажаги бўйича якуний қарор кейинги жараёнларда аниқ бўлиши кутилмоқда.

Эслатиб ўтамиз, 13 декабрь куни АҚШдаги Браун университетида қуролланган шахс туфайли маҳаллий вақт билан кечки соатларда кампусда «фаол қуролли ҳужумчи» ҳақида огоҳлантириш берилган эди. Провиденс мери Бретт Смайли ҳужум натижасида 2 киши ҳалок бўлганини, 9 киши жароҳатланганини эълон қилганди. Расмийлар қуролли ҳужумда гумонланувчи шахс қидирилаётганини маълум қилишганди.

Массачусетс технология институти (MIT) профессори Нуно Лоурейро эса 15 декабрь кечаси Массачусетснинг Бруклин шаҳарчасидаги уйида ҳужумга учраб ҳалок бўлган эди.

Ҳукумат вакиллари Браун университетидаги ҳужум ва MIT профессорининг ўлдирилишида гумонланувчи 48 ёшли Португалия фуқароси Клаудио Невеш Валенте Нью-Ҳэмпширда ижарага олган омборхонасида ўлик ҳолда топилганини билдиришди. Валентенинг ўз жонига қасд қилгани ҳақидаги маълумотни улашган расмийлар, гумонланувчи 2000-2001 йилларда Браун университетида физика соҳасида магистратура босқичида таҳсил олганини қайд этишди.