АҚШ Адлия вазирлиги Эпштейн архивини эълон қилди

АҚШ Адлия вазирлиги Эпштейн ишига оид кенг кўламли ҳужжатлар архивини эълон қилди. Эълон қилинган тасвирларда Эпштейн билан бирга кўплаб машҳур шахсларнинг суратлари жой олган.

АҚШ Адлия вазирлиги, Трамп маъмурияти давридаги қонуний муддат тугаши билан, вафот этган жинсий жиноятчи Жеффри Эпштейн билан боғлиқ минглаб ҳужжатларни эълон қилишни бошлади. Вазирлик ушбу ҳужжатларни justice.gov/epstein ҳаволаси орқали фойдаланиш учун очди.

Адлия вазирлиги жума куни жинсий жиноятларда айбланиб ҳукм қилинган Жеффри Эпштейн бўйича тергов давомида тўпланган ҳужжатлар ва видеоларни ўз ичига олган минглаб файлларни оммага тақдим этди. Адлия вазири ўринбосари Тодд Бланш (Todd Blanche) ҳозирги босқичда юз минглаб ҳужжатлар эълон қилинишини, келгуси ҳафталарда эса қўшимча ҳужжатлар очиқланишини айтди.

Кўпдан бери кутилган ва қисман цензура қилинган ушбу архив Президент Трампнинг ўз тарафдорларини руҳлантирган сайловолди ваъдасини бажармоқда. Файлларнинг баъзи саҳифалари цензура қилингани ва шахсларнинг юзлари ёпиб қўйилгани кўринади. Баъзи маълумотларнинг яширилишига сабаб сифатида Эпштейннинг ҳаёт бўлган яқинларини ва бошқа шахсий маълумотларни ҳимоя қилиш экани таъкидланди.

Бу маълумотларнинг эълон қилиниши Конгрессдан деярли бир овоздан ўтган «Эпштейн файллари шаффофлиги тўғрисида»ги қонун (Epstein Files Transparency Act) талабига кўра мажбурий эди. Трамп республикачиларни бу ташаббусдан воз кечишга кўндира олмагач, ниҳоят қонунни имзолади. Қонун лойиҳаси ҳужжатларни 19 декабргача топширишни шарт қилиб қўйган эди.

Маълумот учун: Энг кичиги 14 ёшда бўлган 18 ёшдан кичик ўнлаб қизларга нисбатан жинсий зўравонлик қилиш ва фоҳишалик тармоғини ташкиллашда айбланиб судланган Эпштейн, 2019 йил 10 август куни Нью-Йоркнинг Манҳэттен туманидаги Метрополитен тергов қамоқхонасидаги камерасида ўлик ҳолда топилган эди.

Очиқланган Эпштейн иши ҳужжатларида қуйидаги машҳур исмлар тилга олинган:

Принц Эндрю

АҚШ Президенти Дональд Трамп

АҚШ собиқ Президенти Билл Клинтон

Исроил собиқ Бош вазири Эҳуд Барак

АҚШ собиқ Вице-президенти Эл Гор

Актёр Кевин Спейси

Хонанда Майкл Жексон

Иллюзионист Дэвид Копперфильд

Адвокат Алан Дершовиц

Нью-Мексико собиқ губернатори Билл Ричардсон

АҚШ Федерал қидирув бюроси (ФҚБ/FBI) ва Адлия вазирлиги ўтказган текширув натижасида, машҳур шахслардан иборат «мижозлар рўйхати» тутилганига доир ҳеч қандай далил топилмаганини эълон қилди. Шунингдек, ҳукумат амалдорлари, машҳурлар ва ишбилармонлар иштирокидаги жиноятларни яшириш мақсадида ўлдирилгани иддао қилинган Жеффри Эпштейннинг аслида камерасида ўз жонига қасд қилгани ҳақида хулосага келингани билдирилди.

Америкалик журналист Такер Карлсон ҳам Эпштейн «Исроил учун ишлаганини, Вашингтонда ҳамма шундай ўйлашини, аммо буни очиқ айтиб бўлмаслигини» иддао қилган эди. «Wall Street Journal» (WSJ) газетаси эса Эпштейннинг севгилиси Гизлейн Максвелл Эпштейннинг 50 ёшлик юбилейи муносабати билан танишларидан унга хат ёзишларини сўраганини ва улардан бири Трампга тегишли эканини илгари сурган эди.