Зеленскийдан АҚШга ғалати таклиф

Украина Президенти Владимир Зеленский АҚШнинг Мадурога қарши амалиётини мисол қилиб кўрсатган ҳолда, Вашингтонни Чеченистон раҳбари Рамзан Қодировни лавозимидан четлатишга чақирди. Қодиров эса Зеленскийнинг сўзларига Telegram орқали кескин жавоб қайтарди.

Украина Президенти Владимир Зеленский АҚШнинг Венесуэла етакчиси Николас Мадурони ҳокимиятдан ағдариш бўйича амалиётини мисол келтириб, АҚШ худди шундай қадам билан Чеченистон раҳбари Рамзан Қодировни ҳам лавозимидан четлатишини талаб қилганини айтди. Зеленский бу каби уриниш Россия Президенти Владимир Путинга босим ўтказиши мумкинлигини таъкидлади.

Зеленский журналистларга берган баёнотида АҚШнинг Мадурога қарши амалиёти бутун дунёда кузатилганини ва бу қадам Кремлга таъсир қилиши мумкинлигини илгари сурди. Шу нуқтайи назардан, Қодировнинг ҳам шунга ўхшаш амалиёт нишонига айланиши Путиннинг Украинадаги тажовузкор позициясини қайта кўриб чиқишига сабаб бўлиши мумкинлигини билдирди.

Зеленский АҚШ зарур воситаларга эга эканини қайд этиб, Вашингтон хоҳлаганда босим ўтказа оладиган қадамларни ташлай олишини урғулади. Мадуро воқеаси бунга намуна бўла олишини айтган Зеленский: “Мадуро амалиётини ҳамма кўрди... Энди худди шу ёндашувни Қодировга нисбатан ҳам қўллашсин”, деди.

Қодиров эса Зеленскийнинг сўзларига Telegram орқали кескин муносабат билдириб, Украина етакчисининг бу ифодасини “уятли” деб атади ва танқид қилди.

Украина раҳбарига қарата баёнот берган Қодиров: “Обрўйингни сақла ва ўзингни пастга урма. Агар сенда озгина бўлса ҳам мардлик бўлганида, сўзларинг ва истакларинг нақадар таҳқирли эканини тушунардинг”, деди.

Бу баёнотлар Россия билан давом этаётган урушда Украина ўз иттифоқчиларидан янада кучлироқ қадамлар кутаётганини яна бир бор намойиш этди.