Хаби Алонсо “Реал” бош мураббийлигидан кетди

Испаниялик мутахассис Хаби Алонсо Мадриднинг “Реал” клуби бош мураббийи лавозимини тарк этди. Бу ҳақда душанба, 12 январь куни “Қироллик клуби” матбуот хизмати хабар берди.

“«Реал» футбол клуби Хаби Алонсо билан ўзаро келишувга кўра, унинг асосий жамоа бош мураббийи сифатидаги фаолиятини якунлашга қарор қилинганини эълон қилади. Хаби Алонсо доимо барча «Реал» мухлисларининг меҳри ва эҳтиромида бўлади, чунки у «Реал» афсонаси ва ҳар доим клубимиз қадриятларини ифода этиб келган. Мадриднинг «Реал» клуби доимо унинг уйи бўлиб қолади.

Клубимиз Хаби Алонсо ва унинг бутун мураббийлар штабига ушбу даврдаги меҳнатлари ва садоқатлари учун миннатдорчилик билдиради ҳамда уларга ҳаётларининг янги босқичида барча яхшиликларни тилайди”, — дейилади хабарда.

Испаниялик мутахассис жамоани 2025 йилнинг ёзидан бери бошқариб келаётган эди. У ғалабалар фоизи бўйича охирги 10 йил ичида клубнинг барча мураббийлари орасида энг яхши кўрсаткичга эга. “Қаймоқранглилар” бош мураббийи сифатида Алонсо ўтказилган ўйинларнинг 71 фоизида ғалаба қозонган. Иккинчи ўринда — жамоани 2021 йилдан 2025 йилгача бошқарган Карло Анчелотти (68,8 фоиз) бормоқда. Кучли учликни Зинедин Зидан (60,5 фоиз) якунлаб беради.

“Қироллик клуби”нинг янги бош мураббийи этиб жамоанинг яна бир собиқ футболчиси — Альваро Арбелоа тайинланди. Бунгача у Мадрид клубининг ёшлар жамоаси мураббийи лавозимида ишлаб келаётган эди.

Ҳозирда Мадрид клуби Испания чемпионати турнир жадвалида иккинчи ўринни эгаллаб турибди. Пешқадам “Барселона” билан фарқ тўрт очкони ташкил этади. Якшанба, 11 январь куни “Реал” Испания Суперкубоги финалида “Барселона”га (2:3) имкониятни бой берган эди.

Шу билан бирга, журналист Пепе Альвареснинг “X” ижтимоий тармоғида хабар беришича, Алонсо бош мураббийлик лавозимини тарк этишга ўзи қарор қилган, чунки у кийиниш хонасидаги худбинлик ва шу ҳафтада янада кучайган доимий ҳурматсизликдан чарчаган. Иккинчи сабаб сифатида сўнгги ойларда клуб томонидан қўллаб-қувватлаш етишмагани кўрсатилмоқда.

“The Touchline” нашрининг таъкидлашича, испаниялик мутахассис кетишининг сабабларидан бири — Франциялик ҳужумчи Килиан Мбаппенинг Испания Суперкубоги финалидаги хатти-ҳаракати бўлган. Ўйиндан сўнг Алонсо ўз футболчилари “Барселона” аъзолари учун “шараф йўлаги” ташкил қилишини истаган, бироқ Мбаппе жамоадошларига буни қилишга йўл қўймаган ва уларни майдонни тарк этишга чақирган. Алонсо бу ҳаракатни ўз обрўсига тўғридан-тўғри таҳдид сифатида қабул қилган.