Футбол бўйича Африка Кубоги финали жанжал билан якунланди

Сенегал терма жамоаси Африка Миллатлар Кубоги финалида Марокашни қўшимча вақтда 1:0 ҳисобида мағлуб этиб, икки карра Африка чемпионига айланди.

Рабат шаҳрида ўтган учрашувнинг асосий вақти голсиз дуранг билан якунланди. Ғалаба голини 94-дақиқада сенегаллик ярим ҳимоячи Пап Гейе киритди. Шу тариқа, Сенегал 2021 йилги муваффақиятини такрорлади, Марокаш эса сўнгги бор ушбу турнирда 1976 йилда зафар қучган эди.

Асосий вақт тугашига бир неча дақиқа қолганда, ўйин келиб чиққан жанжал туфайли 10 дақиқага тўхтаб қолди. Аввалига ҳакам сенегалликларнинг голини бекор қилди, сўнгра VAR тизимини кўздан кечиргач, Сенегал жарима майдончаси ичидаги қоидабузарлик учун Сенегал дарвозасига пенальти белгилади.

Бу қарор Сенегал жамоасининг кескин эътирозига сабаб бўлди. Бош мураббий Пап Тьява ҳакам билан қисқа мулоқотдан сўнг ўз футболчиларига майдонни тарк этиш ҳақида кўрсатма берди, трибуналарда эса мухлислар муштлашув бошладилар.

Жамоа трибуна остидаги йўлакка кириб кетди ва фақат 10 дақиқадан кўпроқ вақт ўтгач, қўшиб берилган вақтнинг 12-дақиқасида майдонга қайтди. Бир неча дақиқадан сўнг, “Реал” клуби футболчиси Браим Диас пенальтини ижро этиш учун нуқтага яқинлашди. Марокашлик футболчи дарвозабонни алдаш мақсадида тўпни дарвоза марказига “паненка” услубида тепди, бироқ Эдуар Менди вазиятни тўғри баҳолаб, тўпни осонлик билан эгаллаб олди.

Экстра-таймда Сенегал устунликка эга бўлди ва ундан 94-дақиқадаёқ унумли фойдаланди. “Вильярреал” аъзоси Пап Гейе майдон марказида тўпни қабул қилиб, бир нечта рақибларини ортда қолдирди ва узоқ бурчакка аниқ зарба йўллади.

Учрашув 1:0 ҳисобида якунланди — Сенегал ўз тарихида иккинчи бор Африка Кубогини қўлга киритди.