Эрон АҚШни сулҳни бузишда айблади

Эрон Уммон қўлтиғида Ислом Республикаси байроғи остидаги юк кемасига АҚШ томонидан қилинган ҳужумни сулҳнинг бузилиши деб атади ва Теҳрон раҳбариятининг даъвосига кўра, АҚШ ҳарбий кемаларига учувчисиз учиш аппаратлари (дронлар) билан зарбалар берди.

Нашрнинг ёзишича, бу ҳақда душанбага ўтар кечаси, 20 апрель куни мамлакат қуролли кучлари марказий штаби – “Ҳазрат Хотам ал-Анбиё” вакили баёнот берган.

“Тажовузкор Америка сулҳни бузди ва денгиз қароқчилиги ҳаракатини содир этди”, дейилади Эроннинг “Tasnim” давлат ахборот агентлиги иқтибос келтирган ҳарбийлар баёнотида.

Аввалроқ АҚШ Президенти Дональд Трамп ўзининг “Truth Social” ижтимоий тармоғида якшанба куни АҚШ Ҳарбий-денгиз кучлари Уммон қўлтиғида Эрон байроғи остидаги “TOUSKA” юк кемасини тутиб олганини маълум қилган эди. Унинг сўзларига кўра, кема Вашингтон томонидан Эрон портларига қўйилган денгиз қамалини айланиб ўтишга уринган. Трампнинг таъкидлашича, Эрон экипажи бўйсунишдан бош тортган, шундан сўнг АҚШ ракета эсминеци кеманинг машина бўлимига тешик очиб, уни тўхтатган. Ҳозирда кема АҚШ денгиз пиёдалари назорати остида қолмоқда.

Кеманинг қўлга олинганини АҚШ Қуролли Кучларининг Яқин Шарқдаги Марказий қўмондонлиги (CENTCOM) ҳам тасдиқлади.

Теҳрон ва Вашингтон ўртасидаги янги кескинлик фонида, АҚШ президенти аввалроқ эълон қилган музокараларнинг янги босқичи тақдири номаълумлигича қолмоқда, деб ёзади “AFP” агентлиги. “Tasnim” маълумотларига кўра, Эрон ҳукумати Ҳурмуз бўғозидаги мамлакат портларининг АҚШ томонидан қамал қилиниши давом этар экан, Қўшма Штатлар билан музокараларда иштирок этишни режалаштирмаяпти.