Америка кучи, Эрон кучи!..

Эроннинг АҚШ-Исроил ҳужумлари қаршисидаги қаршилиги кутилганидан ёки тахмин қилинганидан бир оз юқорироқ чиққач, баъзиларнинг ҳисоб-китоби чиқмай қолди!.. Буларнинг бошида, албатта, Трамп ва Нетаняху турибди!

Агар Эрон сўнгги бир неча йил ичида Исроил томонидан амалга оширилган суиқасдларга қарши бир оз тартиблироқ ва эҳтиёткорроқ бўла олганида эди, ҳозирда Сионист-Евангелист фронтига қарши кутилмаган тарзда намойиш этаётган психологик қаршилик ва ўзига бўлган ишончни анча олдинроқ кўрсата олган бўларди. Ва балки тартиблироқ ҳамда самаралироқ кураш учун жиддий устунликка эга бўлиши мумкин эди. Бироқ ундай бўлмади; йиллар давомида Эроннинг, айниқса, ядровий физика соҳасида изланишлар олиб бораётган муҳим олимлари бирин-кетин йўқ қилинди. Мамлакат ичида ҳам Исроил айғоқчилари муҳим объектларга қаратилган жуда самарали операцияларни амалга оширди. Эрон нуфуз жиҳатидан катта зарбалар олди.

Бунинг сўнгги йирик мисоли 2025 йил июнь ойида юз берган ўн икки кунлик АҚШ-Исроил ҳужумида кузатилди. Эроннинг энг юқори бўғинидаги барча ҳарбий мулозимлари бир кечада ўз тўшакларида ўлдирилди... Шунингдек, Эроннинг ўша пайтдаги ҳужумларга берган реакцияси ҳам анча заиф қолди. Мана шундай руҳий ҳолатда, 28 февралда бошланган сўнгги ҳужумларга қарши туришга ҳаракат қилаётган Эрон давлати, разведка жиҳатидан яна жуда катта йўқотишларга дуч келди. Бошда диний раҳбар Али Хоманаий бўлиб, мамлакатнинг сиёсий ва ҳарбий юқори мартабали шахслари худди шу тарзда бир кунда сафдан чиқарилди. Йиллар давомида бу каби суиқасдларни МРБ (CIA) кўмагида жуда осонлик билан амалга ошириб келаётган МОССАД, бу сафар бутунлай натижага эришиш учун Эронни парчалаб юборадиган ички низони келтириб чиқаришга қаттиқ ҳаракат қилди...

Эрон режимининг юқори лавозимли шахслари йўқ қилингач, халқ ғалаёнга келиб, тизимни тубдан ўзгартириш учун ҳаракат бошлайди деган ҳисоб-китоб (Трамп айнан шу ҳисоб билан Нетаняхунинг ортидан эргашган эди...) кутилган натижани бермади. Аксинча, Эрон халқи аввалроқ режимга қанчалик қарши бўлмасин, унинг атрофида жипслашди. Шу тариқа, дастлабки кунларда анча довдираб қолган Эрон қисқа вақт ичида ўзини тиклаб олди...

Эҳтимолий суиқасдларга қарши сиёсий ва ҳарбий захира кадрларни тайёрлаган ҳамда “мозаика мудофаа модели”га ўтган Теҳрон раҳбарияти, бошда АҚШ ва Исроил бўлиб, кўпчиликни ҳайратда қолдирадиган қаршилик кўрсата бошлади... Эроннинг ушбу сўнгги ҳужумга қарши қўллаган тактика ва стратегияси ҳам, тўғриси, анча самарали бўлмоқда. Бунинг бошида, айниқса, АҚШ учун юқори харажат келтириб чиқаришга қаратилган қарши ҳужумлар тахминлардан ҳам юқори натижа берди. Эрон дастлабки кунларда нисбатан арзонроқ ўқ-дорилар билан АҚШ ва Исроилнинг қимматбаҳо ҳаво ҳужумидан мудофаа тизимларини кўп харажат қилишга мажбурлаган бўлса, кейинчалик самаралироқ ва кучли ракеталар билан муҳим объектларни нишонга олди. Трамп ҳар куни “Эронни тугатдик, ҳеч вақо қолмади...” деб лоф уришга ҳаракат қилаётган бир пайтда, Эрон кун сайин ўз қарши ҳужумларини янада самарали ва аниқ амалга ошириб, ҳаммани лол қолдирди. Кўриниб турибдики, Эрон ҳам ўтган июнь ойидаги 12 кунлик ҳужумлардан дарс чиқарган, ҳам мудофаа саноатида муҳим ютуқларга эришган...

Аммо Эроннинг асосий ҳал қилувчи қадами Ҳурмуз бўғози билан боғлиқ. Зеро, дунё нефть ва суюлтирилган табиий газ оқимининг бешдан бири ўтадиган ушбу стратегик бўғоздаги геосиёсий устунлигидан фойдаланиши АҚШ ва Исроилни жуда қийин аҳволга солиб қўйди. Бу орада, Эроннинг шу пайтгача унчалик кўз-кўз қилмаган анча кучли ракеталари билан Исроил шаҳарларига ва Кўрфаз давлатларининг нефть ва бошқа иншоотларига уюштирган ҳужумлари қаршилик кучининг даражасини кўрсатиб қўйди. Ҳинд океанидаги АҚШнинг Диего Гарсия базасига иккита ўрта масофали ракета отилиши (ҳарчанд нишонга тегмаган бўлса-да) катта акс-садо берди. Қисқаси, икки кунда таслим бўлиши айтилган Эрон кутилганидан анча қаттиқроқ чиқди ва бу қаршилик, айниқса, Трампни бутунлай саросимага солиб қўйган кўринади.

Дунёнинг супер кучи раҳбари бўлишига қарамай, унинг обрўси ер билан битта бўлди! Сабаби оддий; ўз мавқеига мутлақо тўғри келмайдиган даражада изчилликдан йироқ гапирмоқда... Жаноб Трамп аслида сиёсий инқироз ёқасида! У шу вазиятдан чиқиш йўлини изламоқда. Бир қарасанг, важоҳат билан таҳдид устига таҳдид ёғдирган ўша Трамп, кундалик равишда ортга қадам ташлашдан тортинмаяпти. Бунинг сўнгги мисоли – Ҳурмуз бўғози масаласида Эронга берган қирқ саккиз соатлик ултиматумини беш кунгача узайтирганидир. Бу орада Эрон томони доимий равишда рад этса-да, Трамп қатъият билан музокара олиб борилаётганини айтмоқда! У ўзининг ижтимоий тармоқдаги саҳифасида шундай баёнот берди:

"АҚШ ва Эрон ўртасида сўнгги икки кун давомида Яқин Шарқдаги адоватларимизнинг тўлиқ ва қатъий ечимига қаратилган жуда яхши ва самарали музокаралар ўтказилганини эълон қилишдан мамнунман. Ушбу чуқур, батафсил ва конструктив музокараларнинг оҳанги ва мазмунига таяниб ҳамда музокаралар шу ҳафта давомида давом этиши сабабли, Мудофаа вазирлигига Эрондаги электр станциялари ва энергия инфратузилмасига қаратилган барча ҳарбий ҳужумларни 5 кун муддатга кечиктириш бўйича кўрсатма бердим. Бу кечиктириш давом этаётган учрашув ва музокараларнинг муваффақиятли кечишига боғлиқ."

Эрон Ташқи ишлар вазирлиги томонидан берилган баёнот эса янада диққатга сазовор:

"АҚШ Президенти Дональд Трампнинг АҚШ ва Эрон ўртасида давом этаётган музокаралар ҳақидаги баёнотларини инкор этамиз. Эрон урушда ўз мақсадларига эришмагунча, ҳар қандай музокарани рад этиш позициясида собит қолмоқда."

Тўғрисини айтганда, Эроннинг шунча тарқоқлик ва камчиликларига қарамай, бу даражада самарали қаршилик кўрсатиши жуда маъноли. Супер куч Америка ва унинг соясидаги Исроилга қарши анча камтарона имкониятлар билан курашаётган Эрон, агар бу ишни охиригача етказа олса, ҳам сионист Исроил устидан ҳақиқий маънода ғалаба қозонган бўлади, ҳам АҚШ афсонасига қаттиқ путур етказади...