Исроилнинг собиқ Бош вазири Нетаняхуни қаттиқ танқид қилди

Исроилнинг собиқ Бош вазири Эхуд Барак телекўрсатувлардан бирида урушнинг бориши ҳақида фикр билдириб, Нетаняху ҳукуматини кескин танқид қилди. Нетаняхунинг “ғалаба яқин” деган сўзлари ҳақиқатни акс эттирмаслигини айтган Барак: “Исроил очиқчасига ёлғон гапиряпти! Халқ билан бундай гаплашиб бўлмайди. Ҳақиқатни айтишимиз керак!” деди.

Яқин Шарқдаги тўқнашувлар учинчи ҳафтани ортда қолдираётган бир пайтда, Эхуд Барак кеча “Kanal 13” эфирида Исроил Бош вазири Нетаняхуга қаратилган баёнотлар берди. Урушнинг ҳозирги ҳолатини баҳолаган Барак ҳукуматнинг гаплари билан майдондаги воқелик бир-бирига мос келмаётганини таъкидлади.

Нетаняхунинг “ғалаба яқин” деган баёнотларини кескин қоралаган Барак, қарийб 3 йилдан бери давом этаётган тўқнашувларда Исроил сезиларли муваффақиятга эриша олмаганини иддао қилди. “Халқни иллюзия билан ухлатишяпти” деган Барак уруш бошланганидан бери аниқ бир мақсад ва сиёсий қараш мавжуд эмаслигини тилга олди.

Бошловчининг “Урушни тугата олмаслигимизни айтиш этиками?” деган саволига Барак шундай жавоб берди:

“Ҳар қандай урушда эришиш мумкин бўлган мақсадлар ва сиёсий қараш бўлиши керак. Бу бошидан бери йўқ эди. Тахминан 2,5 йилдан бери уруш давом этяпти: Ҳамас ҳали ҳам ўша ерда, Ҳизбуллоҳ ҳали ҳам оёқда! Олти марта «мутлақ ғалаба» ваъда беришди, «Эроннинг инфратузилмасини йўқ қиламиз» дейишди... ! Исроил очиқчасига ёлғон гапиряпти! Халқ билан бундай аҳмоқона гаплашиб бўлмайди. Ҳақиқатни айтишимиз керак!”

Шунингдек, Барак Эроннинг бойитилган уран қувватига эътибор қаратиб, буни ҳарбий йўл билан йўқ қилиш ҳақиқатга тўғри келмаслигини айтди. Исроилнинг Эронга қарши қисқа вақт ичида натижага эришиши мумкин эмаслигини таъкидлаган Барак, АҚШ ҳам буни бир неча ой ичида уддалай олмаслигини илгари сурди.

Баёнотлари давомида АҚШни ҳам танқид қилган Барак Вашингтоннинг сўнгги 60 йилдаги уруш тарихига ишора қилиб: “Америка деярли ҳар бир жангда ғалаба қозонди, лекин ҳеч қайси урушда ғолиб бўлмади. Биз ҳам худди шу хатога йўл қўйяпмиз. Раҳбарият ҳақиқатни яширяпти; ҳақиқат бўлмаса, ишонч ҳам бўлмайди. Бу йўлнинг охири жарликдир”, деди.