3 дақиқада 9 миллион евролик ўмариш

Дунёнинг турли бурчакларидан келтирилган нодир асарларга мезбонлик қилувчи “Magnani Rocca” жамғармаси музейи 22 мартдан 23 мартга ўтар кечаси ниқоб таққан профессионал тўда томонидан эшикларни бузиб кириш орқали бор-йўғи 3 дақиқа ичида тунаб кетилди.

Италиядаги машҳур полотнолар сақланувчи хусусий жамғарма музейи бўлган тарихий “Villa dei Capolavori” ниқобли тўда томонидан атиги 180 сония ичида ўмарилди. Орасида Ренуар, Сезанн ва Матисс каби дунёга машҳур рассомларнинг бебаҳо асарлари бўлган 9 миллион евролик коллекция нишонга олинди.

Хавфсизлик тизимлари ишга тушиши туфайли янада каттароқ фалокатнинг олди олинган бўлса-да, Италия жандармерияси профессионал тўданинг изига тушди. Луврдаги машмашадан кейин тарихга кирган ушбу ўғрилик 22 мартдан 23 мартга ўтар кечаси содир бўлди.

Юзлари ниқобланган ва ўта профессионал экани айтилган ўғрилар музей эшикларини бузиб ичкарига киришган. Хавфсизлик камераларига муҳрланган тасвирларга кўра, тўда энг қимматбаҳо асарларни танлаб олиб, атиги 3 дақиқа ичида кўздан ғойиб бўлган.

“Magnani Rocca” жамғармаси хавфсизлик тизимлари ва махсус қўриқчиларнинг тезкор аралашуви туфайли ўғрилар режалаштирган барча асарларни олиб кетолмаганликларини маълум қилди. Ўғирланган асарлар орасида санъат тарихининг тамал тошлари мавжуд.

Француз рассомларининг ўлмас асарлари бўлган Пьер Огюст Ренуарнинг “Les Poissons”, Поль Сезанннинг “Tasse et plat de cerises” ва Анри Матисснинг “Odalisque sur la terrasse” номли полотнолари энди ўғрилар қўлида. Санъат тарихчиси Луижи Маньянининг шахсий коллекциясидан қолган ушбу нодир намуналарни очиқ бозорда сотиш имконсиз экани, улар фақат “қора бозор”да қўлдан-қулга ўтиши мумкинлиги билдирилди.