Эрон: Минтақадаги АҚШ компанияларига зарба берамиз

Трампнинг “Эроннинг ҳарбий салоҳияти тугади, режим ўзгарди” деган баёнотларига Теҳрондан жавоб келди. Қасос ҳужумларини давом эттираётган Ислом инқилоби қўриқчилари корпуси эртадан бошлаб минтақада фаолият юритаётган АҚШда асос солинган компаниялар бевосита нишонга олинишини эълон қилди. Баёнотда Cisco, HP, Intel, Oracle, Microsoft, Apple, Google, Meta, IBM, Dell, Palantir, Nvidia, JP Morgan, Tesla, GE, Spire Solution, G42 ва Boeing компаниялари огоҳлантирилди.

АҚШ Президенти Дональд Трамп Эрон операцияларида режалаштирилган жадвалдан икки ҳафта олдин боришаётганини ва “ғалаба эълон қилинишига оз қолганини” даъво қилаётган бир пайтда, Теҳрон раҳбариятидан урушни янги босқичга олиб чиқувчи критик қадам ташланди.

Эрон, АҚШ ва Исроилнинг ҳужумларига жавобан эртадан бошлаб минтақадаги АҚШга тегишли компанияларни тўғридан-тўғри нишонга олишини маълум қилди.

Эрон Ислом инқилоби қўриқчилари корпуси (ИИҚК) АҚШ ва Исроилни Эрондаги суиқасдларда айблаб, мамлакатда содир этиладиган ҳар бир суиқасд учун, биринчи навбатда Apple, Microsoft, Google, Nvidia ва Intel каби 18 та Америка компанияси нишонга олинишини билдирди.

ИИҚК томонидан берилган ёзма баёнотда шундай дейилади:

“Террорчилик ҳаракатлари тўхтатилиши кераклиги ҳақида қилган такрорий огоҳлантиришларимизни эътиборсиз қолдирдингиз. Бугун ҳам сизнинг ва исроиллик иттифоқчиларингизнинг террор ҳужумлари натижасида баъзи Эрон ватандошлари ҳаётдан кўз юмди. Суиқасд нишонларини режалаштириш ва кузатишда АҚШнинг ахборот-коммуникация технологиялари ҳамда сунъий интеллект компаниялари асосий рол ўйнашини инобатга олган ҳолда, ушбу ҳаракатларга жавобан бундан буён мазкур операцияларда таъсири бўлган етакчи ташкилотлар бизнинг қонуний нишонларимиз бўлади.”

ИИҚК, шунингдек, мазкур компаниялар ходимларига ҳам мурожаат қилди:

“Ушбу ташкилотлар ходимларига ўз ҳаётларини асраш мақсадида иш жойларини зудлик билан тарк этишни тавсия қиламиз. Бундан ташқари, ушбу террорчи компаниялар жойлашган ҳудудларда яшовчи аҳолига ҳам 1 километр радиусдаги майдонни тарк этиб, хавфсиз ҳудудларга кетишни маслаҳат берамиз.”

Нишонга олинадиган компаниялар рўйхати ҳам илова қилинган баёнотда:

“Террор режаларида фаол иштирок этаётган компаниялар ҳар бир суиқасдга жавобан қасос доирасида нишонга олинади. Шу муносабат билан Cisco, HP, Intel, Oracle, Microsoft, Apple, Google, Meta, IBM, Dell, Palantir, Nvidia, JP Morgan, Tesla, GE, Spire Solution, G42 ва Boeing компаниялари 1 апрель, чоршанба куни Теҳрон вақти билан соат 20:00 дан бошлаб, Эронда содир бўладиган ҳар бир суиқасдга жавобан тегишли бўлинмаларининг йўқ қилинишини кутишлари керак”, – дейилди.

Эроннинг ҳарбий салоҳияти катта ўлчамда таъсирсиз ҳолга келтирилганини даъво қилган Трамп ўз баёнотида мамлакатда “анча мулоҳазали” иш тутадиган янги шахслар бошқарувга кела бошлаганини иддао қилган эди.

Ядровий инфратузилма вайрон қилинганини, бироқ ернинг жуда чуқур қатламларидаги иншоотларни бутунлай йўқ қилиш қийинлигини тан олган АҚШ Президенти, операциялар жадвалдан олдин бораётганини ва тахминан икки ҳафталик устунлик билан ҳаракат қилаётганларини таъкидлаган эди.