АҚШ–Ватикан йўналишида можаро

АҚШ Президенти Дональд Трамп Ватикан давлат раҳбари Папа Лео XIV ни урушга қарши баёнотларидан сўнг қаттиқ танқид қилиб: “Эроннинг ядровий қуролга эга бўлишини муаммо деб ҳисобламайдиган Папани истамайман. Лео Папа сифатида ўзини тартибга солиши, радикал сўлларга ёқишга уринишдан воз кечиши керак”, деди. Трампнинг таъкидлашича, Папа Лео XIV айнан унга қарши бўлгани учун бу лавозимга келтирилган: “Агар мен Оқ уйда бўлмаганимда, Лео ҳам Ватиканда бўлмас эди”.

АҚШ Президенти Дональд Трамп Ватикан давлат раҳбари Папа Лео XIV ни урушга қарши чиқишларидан кейин кескин сўзлар билан танқид остига олди. Truth ижтимоий тармоғидаги саҳифасида қолдирган постида Трамп: “Папа Лео жиноятчилик масаласида заиф ва ташқи сиёсатда даҳшатлидир”, деган ибораларни қўллади.

Папа Лео XIV нинг “Трамп маъмуриятидан туйилаётган қўрқув” ҳақида гапирганини иддао қилган Трамп: “У Covid–19 пандемияси даврида черковда ибодат ўтказганлари учун ҳибсга олинган роҳиблар, пасторлар, Католик черкови ва бошқа барча христиан ташкилотлари яшаган қўрқув ҳақида гапирмаяпти”, дея эътироз билдирди.

Папа Лео XIV нинг укаси Луини ўзини қўллаб–қувватлагани учун кўпроқ яхши кўришини урғулаган Трамп: “Чунки Луи ҳақиқий MAGA’чи (Американи қайтадан буюк қилайлик). У масалани тушунади, Лео эса тушунмайди”, деди.

Папа Лео XIV нинг АҚШга қарши позицияда эканига шаъма қилган Трамп шундай деди: “Эроннинг ядровий қуролга эга бўлишини муаммо деб билмайдиган Папани истамайман. Америкамизга улкан миқдорда гиёҳванд моддалар юбораётган ва бундан ҳам баттароғи – қотиллар, наркодиллерлар ва жиноятчиларни ўз ичига олган қамоқхоналарини бизнинг мамлакатимизга бўшатаётган Венесуэлага ҳужум қилишимизни даҳшатли деб ҳисоблайдиган Папани истамайман. Ва жиноятчилик даражасини рекорд даражада пасайтирган, тарихдаги энг буюк биржа қийматларини вужудга келтирган ҳамда буларни мутлақ кўпчилик овози билан сайланиб туриб амалга оширган АҚШ президентини танқид қиладиган Папани ҳам истамайман”.

Папа Лео XIV нинг лавозимга келишини “кутилмаган совға” деб атаган Трамп: “У Папа бўлиш учун ҳеч қайси рўйхатда йўқ эди. Черков томонидан у ерга фақат америкалик бўлгани учун келтирилди. Чунки Президент Дональд Трамп билан курашишнинг энг яхши йўли шу бўлади, деб ўйладилар. Агар мен Оқ уйда бўлмаганимда, Лео ҳам Ватиканда бўлмас эди”, деди.

Папа Лео XIV нинг “жиноят ва ядровий қуроллар масаласида заиф бўлиши” кўнглига ўтирмаётганини қайд этган Трамп: “Черковга борувчилар ва дин арбобларининг ҳибсга олинишини истаганлардан бири ва сўлчи омадсиз бўлган Дэвид Аксельрод каби Обама хайрихоҳлари билан учрашиши ҳам худди шундай”, дея танқид қилди. Трамп Папани сиёсатдан узоқ туришга чақириб: “Лео Папа сифатида ўзини тартибга солиши, соғлом фикрни ишлатиши, радикал сўлларга ёқишга уринишдан воз кечиши ва сиёсатчи бўлишга эмас, балки ажойиб Папа бўлишга эътибор қаратиши керак. Бу ҳолат унга ва энг муҳими, Католик черковига жуда қаттиқ зарар етказмоқда”, дея баҳо берди.

Папа Лео XIV кеча ўтказилган ибодатда урушга қарши фикрлар билдириб, урушга олиб келувчи вазиятни “ҳамма нарсага қодирлик васвасаси” деб атаган эди. Папа Лео: “Ўзини ва пулни бутига айлантириш етар энди! Куч кўрсатиш етар энди! Уруш етар энди! Ҳақиқий куч ҳаётга хизмат қилишда намоён бўлади”, деган ибораларни қўллаган эди. Папа Леонинг исм тилга олмасдан Трампни танқид қилгани илгари сурилган эди.