Apple компаниясида раҳбарият алмашди

Apple компаниясида Стив Жобс вафотидан кейинги энг йирик раҳбарият алмашинуви юз бермоқда. Компания ўзининг узоқ йиллик аппарат таъминоти бўлими раҳбари Жон Тернусни бош ижрочи директор (CEO) лавозимига тайинланганини эълон қилди. Аввалроқ ушбу лавозимни Тим Кук тарк этган эди.

1 сентябрдан бошлаб аппарат таъминотини ишлаб чиқиш бўйича катта вице–президент Жон Тернус Apple компаниясини бошқаради, Тим Кук эса директорлар кенгашининг ижрочи раиси лавозимини эгаллайди.

“Кук ёз охиригача бош ижрочи директор вазифасини бажаришда давом этади ва бошқарувнинг силлиқ ўтишини таъминлаш учун Тернус билан яқин ҳамкорлик қилади”, дейилади Apple пресс-релизида.

Раҳбарият алмашгани ҳақида Кук ҳамжамиятга йўллаган мактубида маълум қилди, компания эса тафсилотларни пресс-релизда чоп этди.

2001 йилдан бери Apple компаниясида ишлаб келаётган Тернус директорлар кенгаши таркибига киради. Reuters агентлиги маълумотларига кўра, у Mac савдосини қайта жонлантиришда асосий рол ўйнаган, 2017 йилдан бери энг йирик янгиланиш бўлган iPhone Air’ни тақдим этган, iPad ва AirPods лойиҳаларини ривожлантиришга ёрдам берган. Шунингдек, у Mac ва iPhone Pro туркумларини, шу билан бирга арзонроқ бўлган MacBook Neo ва iPhone моделларини чиқариш орқали маҳсулотлар хилма-хиллигини кенгайтирган.

2011 йил август ойидан бери Apple компаниясини бошқариб келган Тим Кук даврида компания акциялари қиймати 20 баравар ошгани айтилади. Кукни 1990-йиллар охирида, компания банкротлик ёқасида турганда Стив Жобс ишга таклиф қилган эди.

Сунъий интеллект (СИ) туфайли саноат қайта қурилаётган бир пайтда, Apple ушбу соҳадаги ривожланишни тезлаштириши лозим: 2011 йилда Siri тизими илк бор ишга туширилганига қарамай, компания ҳали СИ соҳасида инқилобий маҳсулот тақдим этгани йўқ. Ваҳоланки, OpenAI каби янги ўйинчилар юз миллионлаб фойдаланувчиларга эга бўлиб улгурди, деб қайд этади Reuters. Шунингдек, Apple дунёдаги энг қиммат компания мақомини Nvidia’га бой берди.

Кук бош ижрочи директор бўлиш у учун юксак шараф эканини ва “Apple компаниясини бутун қалби билан севишини” таъкидлаб, жамоага ишонч ва биргаликдаги меҳнат учун миннатдорчилик билдирди.