Украинада ўт очишни тўхтатиш эълон қилинди

Россия Ғалаба куни муносабати билан 8-9 май кунлари Украинада вақтинчалик ўт очишни тўхтатиш эълон қилганини билдирди. Москва маъмурияти эҳтимолий ҳужумларга нисбатан қаттиқ жавоб берилиши ҳақида огоҳлантирди. Қарордан сўнг Зеленскийдан ҳам баёнот келди.

Россия президенти Владимир Путин собиқ Совет Иттифоқининг Иккинчи жаҳон урушида фашистлар Германиясини мағлуб этгани нишонланадиган Ғалаба куни муносабати билан 8-9 май кунлари Украинада ўт очишни тўхтатиш эълон қилгани маълум бўлди.

Россия Мудофаа вазирлиги томонидан берилган баёнотда Путин Украинада ўт очишни тўхтатиш ҳақида қарор қабул қилгани айтилди. Баёнотда: “Бош қўмондон қабул қилган қарорга мувофиқ, Ғалаба куни муносабати билан 8-9 май кунлари ўт очишни тўхтатиш эълон қилинади. Украина томони ўт очишни тўхтатиш тартибига амал қилади деб умид қиламиз”, деган иборалар келтирилди.

Украина президенти Владимир Зеленскийнинг 9 май Ғалаба кунида Москвага ҳужум қилиш билан таҳдид қилгани тўғрисида тўхталиб ўтилган баёнотда, Россия Қуролли Кучлари Ғалаба куни муносабати билан ўтказиладиган тадбирларда хавфсизликни таъминлаш учун зарур чораларни кўриши таъкидланди.

Баёнотда шундай дейилади:

“Киев маъмурияти жиноий режаларини амалга оширишга уринган тақдирда, Россия Қуролли Кучлари бунга жавобан пойтахт Киев марказига кучли ракета зарбалари йўллайди. Россия ўз қўлидаги барча имкониятларга қарамай, инсонийлик нуқтаи назаридан илгари бундай ҳаракатлардан тийилиб келган эди. Киев аҳолисини ва хорижий дипломатик ваколатхоналар ходимларини шаҳарни ўз вақтида тарк этишлари зарурлиги ҳақида огоҳлантирамиз”.

Украина президенти Владимир Зеленский Путиннинг ўт очишни тўхтатиш таклифи юзасидан баёнот берди. Зеленский: “Россия расмий равишда сўров билан чиқмаган бўлса-да, биз тинчликсевар ниятимизни кўрсатиш учун ўз ўт очишни тўхтатиш тартибимизни бошлаймиз”, деди.