Қарз тўланмагунча паспорт берилмайди

АҚШ Давлат департаменти катта миқдорда алимент қарзи бўлган шахсларнинг паспортларини бекор қилишга тайёрланмоқда. Биринчи босқичда ушбу чекловдан тахминан 2 минг 700 киши таъсирланиши эълон қилинди.

АҚШ Давлат департаменти фарзанди учун юқори миқдорда алимент қарзи бор шахсларга нисбатан янги санкцияни ишга туширмоқда. Департаментнинг “Associated Press” агентлигига берган баёнотига кўра, 8 майдан бошлаб 100 минг доллар ва ундан ортиқ алимент қарзи бўлган шахсларнинг паспортлари бекор қилина бошланади.

АҚШ Соғлиқни сақлаш вазирлиги билан ҳамкорликда олиб борилаётган ишлар доирасида тахминан 2 минг 700 нафар Америка паспорти эгаси ушбу чекловга дуч келиши таъкидланди. Қарзларини тўламагунча, бу шахсларнинг чет элга чиқиш ҳуқуқлари чекланиши маълум қилинди.

Мутасаддилар, шунингдек, келгусида ушбу тизимдаги қарз лимитини 2 минг 500 долларгача тушириш режалаштирилганини очиқладилар. Шу тариқа, кўпроқ алимент қарздорларини тизим қамровига олиш мақсад қилинган.

АҚШ Давлат департаментининг консуллик масалалари бўйича ёрдамчиси Мора Намдар ушбу амалиёт ҳақида тўхталар экан: “Алимент қарзларини ундиришда самарадорлиги исботланган тизимни кенгайтирмоқдамиз”, деган фикрларни билдирди.

Намдар қарзини тўлаган шахслар қайтадан АҚШ паспортини олиш ҳуқуқига эга бўлишини ҳам қайд этди.

АҚШда ажрашган ота-оналар фарзандлари учун белгиланган алимент тўловларини штатларнинг тегишли идоралари орқали амалга оширадилар. Бу тизим ота-оналар ўртасидаги тўлов бўйича келишмовчиликларни камайтириш билан бирга, тўланмаган алиментларни кузатиш ва жазо чораларини қўллаш жиҳатидан қулайлик туғдиради.