Теҳрон Ҳурмуз бўғозини назорат қилиш учун янги идора ташкил этди

Теҳрон маъмурияти глобал нефть ва суюлтирилган табиий газ (СТГ) етказиб беришнинг тахминан бешдан бир қисми ўтадиган Ҳурмуз бўғозини бир томонлама бошқариш, назорат қилиш ва ўтишларни пуллик асосга ўтказиш мақсадида “Форс кўрфази бўғози бошқармаси” (PGSA) номли янги муассаса барпо этилганини эълон қилди.

28 февралда авж олган ҳарбий тўқнашувлардан сўнг Ҳурмуз бўғозини амалда ёпиб қўйган ва глобал бозорларда нефть нархининг 65 фоизгача кўтарилиб кетишига сабаб бўлган Эрон, 8 апрелда эришилган заиф ўт очишни тўхтатиш жараёнига қарамай, ортга чекинмади.

Эрон давлат телевидениеси “Press TV”нинг 5 майдаги хабарига кўра, бўғоздан ўтмоқчи бўлган кемалар "info@PGSA.ir" электрон манзилидан хат оладилар. Бу хат орқали улар Ҳурмуз бўғозидан ўтиш қоидалари ҳақида хабардор қилинади ва кемалар фақат ушбу тизим доирасида ўтиш учун рухсат олишлари мумкин бўлади.

АҚШда жойлашган Х ижтимоий тармоғида ушбу ташкилот билан боғлиқ “Форс кўрфази бўғози бошқармаси” (Persian Gulf Strait Authority – PGSA) номли расмий саҳифа очилди. Янги ташкил этилган PGSA бўғоздан фойдаланувчи тижорат кемаларининг ҳаракатига тўғридан–тўғри аралашишни бошлади. Кемалар фақат ушбу тизим асосида тасдиқ олганидан кейингина денгиз йўлидан фойдаланиши мумкин.

Уруш бошланганидан бери денгиз қатнови ҳеч қачон “урушдан олдинги мақомига қайтмаслигини” эълон қилган Теҳрон, ўтган ойда сув йўлидаги ўтиш тўловларидан илк расмий даромадини қўлга киритганини ҳам маълум қилган эди.

Покистон воситачилигидаги музокаралар натижа бермаганидан кейин, АҚШ президенти Дональд Трамп 13 апрель куни Эрон портларига қарши кенг қамровли “денгиз қамали”ни бошлади.

Бу жараёнда кескинлик энг юқори нуқтага етди. Уммон денгизи ва Ҳинд океанида Эронга тегишли тижорат кемалари АҚШ кучлари томонидан нишонга олинди ва қўлга киритилди. Теҳрон маъмурияти АҚШ қамалига жавобан Ҳурмуз бўғози яқинида тижорат кемаларига, жумладан, Исроилга алоқадор бўлган битта кемага аралашиб, уни ҳибсга олди.