Эронда жаҳон интернет тармоғига кириш имконияти қайта тикланади

Эрон президенти Масъуд Пезешкиан мамлакатда интернетга кириш имкониятини қайтаришни буюрди.

Оммавий ахборот воситаларининг аниқлик киритишича, гап 2025 йилнинг охири – 2026 йилнинг бошида намойишлар сабабли жорий этилган чекловлар ҳақида бормоқда. Хабар қилинишича, Пезешкиан тегишли фармонни Эрон Алоқа вазирлигига юбориб бўлган.

Шу билан бирга, Эрон ҳукуматининг ахборот масалалари бўйича бошқармаси раҳбари Али Аҳмадния ушбу маълумотни тасдиқлади.

“Ҳукуматнинг барча вакиллари интернетни инқироздан олдинги даражагача қайта тиклаш учун овоз бердилар”, деб ёзди Аҳмадния Х ижтимоий тармоғида.

Кутилишича, Эрон президентининг фармони 26 май куни ижро этилади.

Эслатиб ўтамиз, 2025 йил декабрь ойининг охирида Эронда миллий валюта курсининг кескин тушиб кетиши фонида намойишлар бошланган эди. Кейинчалик улар тартибсизликларга ва ҳукуматга қарши акцияларга айланиб кетди. Мамлакатда интернет ўчириб қўйилди.

Январь ойининг ўрталарида расмийлар вазият барқарорлашганини эълон қилганидан сўнг, интернет тармоғига кириш имконияти босқичма-босқич тиклана бошлади. Бироқ, 28 февраль куни АҚШ ва Исроилнинг Эронга қилган ҳужумидан кейин халқаро тармоққа кириш яна чеклаб қўйилди.