Қайси ҳолатларда автомобиль жарима майдончасига қўйилади

Кўпчилик ҳайдовчилар деярли ҳар қандай жиддий қоидабузарлик учун автомобиль жарима майдончасига юборилиши мумкин деб ҳисоблашади. Бироқ амалиётда бундай чора фақат қонунчиликда кўзда тутилган муайян ҳолатлардагина қўлланилади. Қуйида ҳайдовчи қайси қоидабузарликлар туфайли ўз автомобилидан вақтинча маҳрум бўлиши мумкинлиги ҳақида сўз юритилади.

Ҳужжатлар ва рўйхатдан ўтказиш билан боғлиқ муаммолар

Автомобилни махсус тўхташ жойига (жарима майдончасига) юборишнинг энг кенг тарқалган сабабларидан бири - транспорт воситасининг ҳужжатлари ёки рўйхатдан ўтказилиши билан боғлиқ муаммолардир.

Агар ҳайдовчининг мажбурий суғурта полиси бўлмаса, сохта давлат рақам белгиларидан фойдаланса ёки машинани давлат рақамларисиз бошқарса, автомобиль жарима майдончасига жойлаштирилиши мумкин. Шу билан бирга, техник кўрикдан ўтмаганлик қонунга кўра полиция ходимларига “транспорт воситасидан фойдаланишни тақиқлаш” ҳуқуқини беради - бунда одатда давлат рақамларини ечиб олиш назарда тутилади, аммо автоуловни жарима майдончасига олиб кетиш эмас.

Эслатиб ўтамиз, 12 мартдан бошлаб кузатув камералари ҳужжатлар билан боғлиқ қуйидаги қоидабузарликларни қайд эта бошлади:

муддати ўтган техник кўрик;

амалдаги суғурта полисининг йўқлиги.

Шунингдек, автомобилга фото ва видеофиксация камералари томонидан рақамларни аниқлашни қийинлаштирадиган (тўсадиган) қурилмалар ёки материаллар ўрнатилган бўлса ҳам, машина олиб қўйилиши мумкин.

Маълумот ўрнида, йил бошидан буён сохта, яширилган, ўзгартирилган ёки ўқиб бўлмайдиган давлат рўйхатидан ўтказиш рақам белгиларидан фойдаланиш бўйича 1 942 та ҳолат аниқланган - бунда гап фақат йўлларнинг пуллик қисмларида қайд этилган ҳолатлар ҳақида бормоқда.

Тўхташ ва тўхтаб туриш қоидаларини бузиш

Эвакуация қилишнинг яна бир кенг тарқалган сабаби нотўғри парковка билан боғлиқ. Агар автомобиль бошқа транспорт воситалари ёки пиёдаларнинг ҳаракатланишига тўсқинлик қилса ва ўша жойнинг ўзида қоидабузарликни тезкорлик билан бартараф этиш имконияти бўлмаса, у жарима майдончасига юборилиши мумкин.

Шунингдек, ногиронлиги бўлган шахслар учун мўлжалланган жойларга ноқонуний равишда машина қўйганлик учун ҳам эвакуация кўзда тутилган.

Маст ҳолатда машина бошқариш

Автомобилни спиртли ичимлик, гиёҳвандлик моддаси ёки токсикоманик мастлик ҳолатида бошқариш энг жиддий қоидабузарликлардан бири бўлиб қолмоқда. Шундай ҳолатларда транспорт воситаси ушлаб қолинади ва процессуал қарор қабул қилингунга қадар махсус тўхташ жойига жойлаштирилади.

Худди шундай чора полиция ходимларининг талабига биноан тиббий кўрикдан ўтишдан бош тортган ҳайдовчиларга нисбатан ҳам қўлланилади. Таъкидлаш жоизки, тиббий кўрикдан бош тортиш одатда вазиятни янада оғирлаштиради.

Бошқариш ҳуқуқининг йўқлиги

Агар рулда транспорт воситасини бошқариш ҳуқуқига эга бўлмаган шахс ўтирган бўлса ҳам, автомобиль жарима майдончасига тушиши мумкин. Бу ерда гап ҳайдовчилик гувоҳномасини умуман олмаган фуқаролар, шунингдек, илгари суд қарори билан бундай ҳуқуқдан маҳрум этилган ҳайдовчилар ҳақида бормоқда.

Ташиш соҳасидаги қоидабузарликлар

Транспорт воситаларини ушлаб қолиш учун алоҳида асослар юк ва йўловчи ташувчилар учун ҳам кўзда тутилган. Йўловчи ва юк ташиш соҳасидаги қонунчилик талаблари бузилгани аниқланса, автобуслар, таксилар, юк автомобиллари ва бошқа тижорат транспорти жарима майдончасига юборилиши мумкин.

Қоида тариқасида, бу чора транспорт воситасидан бундан буён фойдаланиш йўловчилар ёки бошқа йўл ҳаракати қатнашчилари хавфсизлигига таҳдид солиши мумкин бўлган ҳолатларда қўлланилади.

Бошқа ҳолатлар

Қонунчилик автомобилни махсус тўхташ жойига жойлаштириш учун бир қатор бошқа асосларни ҳам назарда тутади. Улар экология, ўрмон хўжалиги, атроф-муҳитни муҳофаза қилиш, чегара ва бошқа соҳалардаги айрим қоидабузарликлар билан боғлиқ бўлиши мумкин, бу ерда транспорт воситасини ушлаб қолиш қонунда тўғридан-тўғри кўрсатилган.