Буюк Британия бош вазири истеъфога чиқади

Мамлакат бош вазири Кир Стармер эртага, 22 июнь куни ўз ваколатларини расман топшириши мумкин. Бу ҳақда Британия сиёсий доираларидаги манбаларига таяниб ОАВ хабар берди.

Инсайдерларнинг маълумотларига кўра, Стармер амалда Вазирлар Маҳкамасининг аксарият асосий вазирлари ва Лейбористлар партияси донорларининг қўллаб-қувватлашидан маҳрум бўлган, шу сабабли унинг бундан буён бош вазирлик курсисида қолиши сиёсий жиҳатдан имконсиз бўлиб қолди.

Бош вазирнинг кутилаётган истеъфосига ҳафта охирида юз берган воқеалар туртки бўлди, ўшанда унинг олиб бораётган курсидан партия ичидаги норозилик очиқ ультиматумга айланди.

Хабар қилинишича, Британия Вазирлар Маҳкамасининг бир нечта нуфузли аъзолари (жумладан, Ташқи ишлар вазирлиги раҳбари Иветт Купер ва Ички ишлар вазирлиги раҳбари Шабана Маҳмуд) шахсий суҳбатда Стармерга унинг обрўсига путур етганини тушунтиришган ва партиянинг парчаланиб кетишидан сақланиш учун уни ўз хоҳиши билан лавозимини тарк этишга чақиришган.

Бош вазирнинг асосий ички рақиби - Катта Манчестер ҳокими Энди Бёрнем “Мейкерфилд” округи бўйича парламентга ўтказилган қўшимча сайловларда ғолиб чиққанидан кейин вазият янада кескинлашди. У партия етакчилиги ва бош вазирлик курсисига даъво қилиш учун қонуний ҳуқуқни қўлга киритди. 100 дан ортиқ лейборист депутатлар аллақачон унинг номзодини очиқчасига қўллаб-қувватлашга тайёр.

Ҳозирги вақтда Кир Стармер ўзининг “Чекерс” шаҳар ташқарисидаги қароргоҳида бўлиб турибди, у ерда оиласи ва энг яқин маслаҳатчилари билан биргаликда расмий мурожаат матнини якунламоқда ва ҳокимиятни топшириш сценарийсини ишлаб чиқмоқда.

Бош вазир атрофидаги манбаларнинг хабар беришича, Стармер энг яқин иттифоқчиларининг хиёнатидан қаттиқ хафа бўлган, бироқ лавозимдан кетиш муқаррар эканлигини англаб турибди. Ҳозирда унинг асосий вазифаси - Лейбористлар партиясига етадиган зарарни камайтириш ва сайловчилар олдида юзини ёруғ сақлаб қолиш имконини берадиган ҳокимият транзитининг “джентльменлик тақвими”ни келишиб олишдир.

Расмий Лондон ҳозирча истеъфони тўғридан-тўғри тасдиқлашдан тийилмоқда ва Вазирлар Маҳкамаси раҳбари “ўз вазифаларини бажаришда давом этмоқда” деб баёнот бермоқда, бироқ Бирлашган Қиролликнинг етакчи сиёсатшунослари қарор аллақачон қабул қилинган деган фикрда якдилдирлар.

Агар Стармер ўз лавозимини тарк этса, Буюк Британия сўнгги ўн йилдан сал кўпроқ вақт ичида ўзининг еттинчи бош вазирини кўради, бу эса деярли кейинги икки аср ичидаги энг юқори кўрсаткич бўлади.