Венесуэлада кучли зилзилалар юз берди

Венесуэла бир неча соат ичида содир бўлган 7,2 ва 7,5 балли иккита кучли зилзила туфайли ларзага келди. Пойтахт Каракас билан бирга кўплаб ҳудудларда катта вайронгарчиликлар юз берган бўлса, ҳаётдан кўз юмганлар сони ортиб бораётгани ва юзлаб кишилар жароҳатлангани билдирилди. Мутасаддилар вайроналар остида қолган инсонларни қутқариш учун қидирув-қутқарув ишлари тўхтатовсиз давом эттирилаётганини маълум қилдилар.

АҚШ президенти Дональд Трампдан Венесуэлада кетма-кет юз берган 7,2 ва 7,5 балли зилзилалар бўйича баёнот берилди. Ижтимоий тармоқдаги саҳифасида эълон қилган мурожаатида содир бўлган силкинишлар “улкан ҳажмда” эканлигини қайд этган Трамп, “жиддий миқдорда жон йўқотишлари” борлигини билдирди.

АҚШ Венесуэлага ёрдам беришга тайёр, хоҳишли ва қодир эканлигини таъкидлаган Трамп: “Ҳукуматимизнинг барча идораларига тезкорлик билан ҳаракатга келишга тайёр туришлари бўйича топшириқ бердим. Янги ва ажойиб дўстларимизнинг ёнида бўламиз. Дастлабки келган хабарлар яхши эмас” ибораларини қўллади.

Бошқа томондан, Венесуэла вақтинчалик давлат раҳбари Делси Родригес зилзила офатига доир илк рақамларни эълон қилди. Мамлакатдаги ер силкинишларида 32 киши ҳаётдан кўз юмганини, 700 дан ортиқ инсон эса жароҳатланганини билдирган Родригес, қидирув-қутқарув ишлари давом этаётганини ва ўлганлар сонининг ортишидан хавотирда эканликларини айтди.

Силкинишлар пойтахт Каракас ва унинг атрофи бошлиқ кўплаб ҳудудларда вайронгарчиликларга сабаб бўлган эди. АҚШ Геология хизмати (USGS) ҳаётдан кўз юмганлар сони 10 мингдан 100 минг кишигача етиши мумкинлигини тахмин қилиб: “Юқори миқдордаги йўқотишлар ва кенг кўламли шикастланишлар бўлиши эҳтимоли катта ҳамда офатнинг кўлами улкандир” деб баёнот берди.