Исроилнинг Вашингтонга таҳдиди

Исроил маданият вазири “АҚШ яқин келажакда ўзини Исроил билан муқаррар ҳисоб-китоб йўлида кўради” деб айтган бўлса, бошқа бир ирқчи вазир Кац “АҚШ хоҳлаган тақдирда ҳам Ливандан чиқмаймиз” деди.

АҚШнинг Эрон билан эришган ўзаро англашувига исроиллик сиёсатчилар томонидан муносабат билдириш давом этмоқда. Исроилнинг “Yedioth Ahronoth” газетаси тарқатган хабарга кўра, пойтахт Тель-Авивдаги тадбирлардан бирида сўзга чиққан Исроил маданият ва спорт вазири Мики Зоҳар АҚШ президенти Дональд Трампнинг Эрон сиёсатини танқид остига олди.

Вашингтоннинг Эрон билан келишувга эришганига эътироз билдирган Зоҳар “АҚШнинг айни пайтда Эрон масаласига нисбатан тутган позицияси яхши эмас. Улар ким билан муомала қилаётганларини тўлиқ англаб етмаяптилар. АҚШ яқин келажакда ўзини Исроил билан муқаррар тўқнашув ва ҳисоб-китоб йўлида кўради. Бизнинг АҚШга берадиган жавобимиз шартсиз бўйсуниш бўлмайди” деган иборалар билан таҳдид қилди.

Исроил ўз хавфсизлик манфаатларидан келиб чиқиб ҳарбий қадамлар ташлашини даъво қилган Зоҳар “Менинг фикримча, АҚШ билан тузилган шартнома ядровий қурол масаласини ҳал қилмайди ва уруш одамлар ўйлаганидан кўра анча тезроқ қайтиб келади” деган иддаони илгари сурди.

Эрон билан келишувга қарши чиққан яна бир исм - Исроил мудофаа вазири Исраэль Кац Исроил армияси ўзи босиб олган ҳудудлардан чиқмаслигини айтди. “Times of Israel” газетасининг хабарига кўра, пойтахт Тель-Авивдаги тадбирда нутқ сўзлаган Кац Исроил армияси Сурия ва Ливан жанубида қолишда давом этишини иддао қилди.

Кац “АҚШнинг талаби бўлган тақдирда ҳам армия Ливан жанубидан чекинмайди” деган иборани қўллади.

Исроилнинг хавфсизлик тушунчаси шундан иборат эканлигини даъво қилган Кац Исроил аскарлари ўзлари кирган ҳудудларда қолишини ва тинч аҳоли ташқарида бўлишини ёқлаб чиқди.

Исроил истилоси сабабли уй-жойларини тарк этишга мажбур бўлган ливанликлар ўз уйларига қайтмаслигини иддао қилган Кац “Бунга йўл қўймаймиз” деб гапирди. Исроил армияси Ливанга қарши 2 март куни шиддатли ҳаво ҳужумларини бошлаб, мамлакат жанубидаги кўплаб посёлкаларни босиб олган эди.