Нетаньяху омма кўз ўнгида рафиқасидан кетма-кет дакки эшитди

Қудусдаги “Тедди” стадионида ташкил этилган Маккабиа ўйинларининг очилиш маросими Исроил бош вазири Нетаньяху ва унинг рафиқаси Сара Нетаньяху ўртасида камералар қаршисидаги жанжалга саҳна бўлди. Минбарда “Биз ягона оила, ягона тақдирмиз” дея нутқ сўзлаган Нетаньяху, саҳна ортида рафиқасидан ҳамманинг кўз ўнгида дакки эшитди. VIP ложасида хавфсизлик ва ҳамроҳликдаги камчиликлар туфайли тирбандлик орасида қолиб кетганини даъво қилган Сара Нетаньяху, Исроил бош вазирига ва унинг маслаҳатчиларига бақириб-чақириб, стадионни ағдар-тўнтар қилди.

Исроил бош вазири Биньямин Нетаньяху билан рафиқаси Сара Нетаньяху Қудусдаги “Тедди” стадионида иштирок этган расмий спорт тадбирининг очилиш маросимида ўзаро уришиб қолдилар.

Исроил ОАВ-лари бўлмиш “Ynet” ва “13-канал” берган хабарга кўра, Маккабиа ўйинларининг очилишида тегишли равишда ҳимоя қилинмаганини ва оломон орасида эзилиб кетиш хавфини бошдан кечирганини илгари сурган Сара Нетаньяху, турмуш ўртоғи Биньямин Нетаньяхуга бармоқ ўқталиб: “Сенинг дастингдан бу ердаги одамлар билан уришиб қолдим. Мени инсонлар билан тортишишга мажбур қилдинг” деган сўзлар билан ташланди.

Меҳмонларнинг кўз ўнгида дақиқалар давомида чўзилган тортишув пайтида бош вазирнинг маслаҳатчиларини ҳам нишонга олган Сара Нетаньяху: “Мендан кўз-қулоқ бўлишингиз керак эди, нега ўтишимга рухсат берилмаяпти?” дея элчихона ва бош вазирлик хавфсизлик хизмати ходимларини койиб берди.

Журналист Ури Мисгав ва Майкл Шемеш бўлишган видеоларда, ҳодисанинг илк портлаш лаҳзасидан ва дақиқаларча давом этган бақир-чақирлардан кейин ҳам, Сара Нетаньяхунинг ложада ҳали ҳануз ўта безовта ҳаракатлар билан атрофидагиларга ва эрига ғўлдираб норозилик билдиришда давом этган лаҳзалари сонияма-сония қайд этилди.

Собиқ хавфсизлик мудири Ами Дрор ўзи иштирок этган подкаст кўрсатувида, Биньямин Нетаньяху рафиқасини жамоатчилик орасида кучли ва ҳурматли сиёсий шахсга айлантириш учун алоҳида ҳаракат қилганини, бироқ бу стратегия бутунлай барбод бўлганини қуйидагича ифода этган эди:

“Нетаньяху рафиқасини Ҳиллари Клинтонга айлантиришга уринди. Аммо у Ҳиллари Клинтон эмас; у фақат кўзига кўринган, қаршисидан чиққан нарсани олиб кетувчи клептомандир. Расмий ташрифлар чоғида хориж делегациялари томонидан берилган совғалар Нетаньяху оиласининг шахсий мулки эмас, тўғридан-тўғри Исроил давлатига тегишлидир. Шунга қарамай, ушбу давлат мулкларининг барчаси яширинча тайёрланган махсус чемоданларда уларнинг шахсий уйларига ташилар эди. Биз борган ҳашаматли меҳмонхоналардаги сочиқлар ва қимматбаҳо аксессуарлар ҳам худди шу тарзда чемоданларга жойланарди. Меҳмонхона ходимлари ҳар бир чек-аутдан (хонани топширишдан) кейин йўқолган буюмлар сабабли бизни сўроққа тутарди.”

Ами Дрорнинг бир неча ой аввал қилган фош этувчи баёнотлари фақатгина меҳмонхонадаги ўғриликлар ва клептомания иштиёқи билан чекланиб қолмаган эди. Сара Нетаньяху бош вазирлик қароргоҳида ва уй ичида энг ҳукмрон, энг таъсирли шахсга айланганини ҳикоя қилган собиқ хавфсизлик раҳбари даҳшатли сиёсий даъвони ҳам ўртага ташлаган эди. Дрорнинг таъкидлашича, Сара қароргоҳдаги кучи ва нуфузини йўқотмаслик мақсадида, Исроилнинг келажагига дахлдор бўлган критик сиёсий муросаларни ва коалиция битимларини шахсан барбод қилган ва тўсиб қўйган.