Галеондан хазина чиқди

Баҳама ороллари соҳилларида 1656 йилда маржон рифига урилиб чўккан Испаниянинг “Nuestra Senora de las Maravillas” галеони орадан ўтган тахминан 370 йилга қарамай тарихчилар ва сув ости археологларини ҳайратга солишда давом этмоқда.

“Allen Exploration” томонидан сўнгги икки йилда олиб борилган қидирув-тадқиқот операциясида ривожланган сонар ва магнитометр технологияларидан фойдаланилган ҳолда океан тубидан минглаб ноёб асарлар чиқариб олинди.

Кашфиётнинг энг ҳайратланарли томонини Испания аристократияси ва ҳарбий-диний ташкилот ҳисобланган Сантьяго орденига тегишли тақинчоқлар ташкил этди. Сув остидаги хароба изларидан аниқланган 8800 дан ортиқ нишонлар орасидан чиқариб олинган топилмаларда 1,76 метр узунликдаги тилла тўрли занжир ва Колумбия зумрадлари билан безатилган хоч шаклидаги бўйинбоғлар диққатни тортди.

Хароба майдонидан фақатгина заргарлик буюмлари эмас, балки Хитой чинни идишлари, зайтун хумлари, шиша вино идишлари ва кумуш қилич соплари ҳам чиқарилди.

Бошқа томондан, археологлар рўйхатга олинмаган ва расмий декларация қилинмаган олтин ҳамда кумуш буюмларнинг мавжудлигига эътибор қаратиб, галеонда Испания қироллигидан солиқ яширишни истаган савдогарлар контрабанда молларини ташиганига ишора қилдилар.

Испания қироли IV Филиппга олиб борилаётган қироллик солиқлари ва хусусий савдогарларнинг молларини ташиган “Maravillas” кемаси харобасидан чиқарилган тенгсиз коллекция Фрипортдаги Баҳама денгизчилик музейида намойиш этила бошланди.

Экспертлар бўронлар ва океан оқимлари сабабли кенг майдонга тарқалиб кетган хароба остида кашф этилишни кутаётган яна жуда кўп тарихий асарлар мавжудлигини қайд этдилар.