Трамп Анқарадан борт таомлари ортиладиган юк машинасида яширинча олиб чиқилди

АҚШ Президенти Дональд Трамп Эрон томонидан суиқасд хавфи бўлгани сабабли, ҳарбий самолётга ўтказиш учун Анқарадан борт таомлари ташийдиган хизмат машинасида яширинча олиб чиқиб кетилди. Бу ҳақда “Washington Post”, “CNN” ва “New York Times” нашрлари хабар бермоқда.

ОАВ манбаларига кўра, АҚШ махсус хизматларининг ушбу махфий операцияси Туркияда бўлиб ўтган НАТОнинг июль саммити давомида амалга оширилган.

“Анқарада Трамп телекамералар қаршисида Air Force One бортига чиқди. Бироқ орадан бир неча дақиқа ўтиб, у парвоз олдидан борт таомлари ва зарур ашёларни етказиб берадиган аэропорт хизмат машинаси ёрдамида АҚШ Ҳарбий-ҳаво кучларининг кичикроқ C-32A самолётига билдирмасдан ўтказилди”, деб ёзади “Washington Post”.

Нашрнинг таъкидлашича, операция Оқ уй ходимларининг бир қисми ва “президент пули”га кирувчи журналистлардан яширилган. Улар асосий “биринчи борт”да учишган ва президент ўзлари билан бирга эканига тўлиқ ишончи комил бўлган.

Хабарда аниқлик киритилишича, Трампнинг ўзи Пентагон раҳбари Пит Хегсет билан бирга транспондерлари ўчирилган C-32A самолётида учиб кетган. Буюк Британиядаги авиабазага етиб келгач, Трамп сездирмасдан яна асосий лайнерга қайтган ва гўёки парвоз давомида бортни тарк этмагандек ташқи трап орқали пастга тушиб келган.

Вашингтонга қайтиш парвози чоғида ўтказилган суҳбатда президент Теҳрон томонидан ҳаётига доимий хавф таҳдид солаётганига очиқча шама қилди.

“New York Times”нинг қайд этишича, Трампнинг Туркияда бошқа самолётга яширинча ўтишига сабаб бўлган Эрон таҳдиди унинг Қатардан совға қилинган асосий лайнерига эмас, балки бевосита шахсига қаратилган эди. Газета манбасига кўра, хавф ҳақида Трампга ахборот берилгач, зудлик билан фавқулодда ҳаракатлар режаси ишлаб чиқилган.

Туркия томони АҚШ махсус хизматларининг Анқарадаги ушбу махфий операцияси ҳақидаги хабарларга ҳеч қандай муносабат билдирмади.

Туркия ҳукумати “РИА Новости” сўровига жавобан “Биз бу хабарларни шарҳламаймиз, АҚШ томонига мурожаат қилишни тавсия этамиз”, дея маълум қилди.