Қозоғистонда янги банк пайдо бўлиши мумкин

Қозоғистонда Хитойнинг ва бутун дунёнинг энг йирик тижорат банкларидан бири бўлган China Construction Bank шўъба банки очилиши мумкин. Бу ҳақда Молиявий бозорни тартибга солиш ва ривожлантириш агентлиги маълум қилди.

Молиявий бозорни тартибга солиш ва ривожлантириш агентлиги ҳамда Қозоғистон Миллий банки раҳбариятининг China Construction Bank (CCB) раиси Чжан Цзиньлян билан учрашуви бўлиб ўтди.

“Қозоғистон банк секторининг аҳволи ва ривожланиш истиқболлари, икки томонлама молиявий ҳамкорлик, жумладан, Қозоғистонда CCB шўъба банкини ташкил этиш масалалари муҳокама қилинди”, дейилади тарқатилган хабарда.

Шунингдек, учрашув якунлари бўйича томонлар икки мамлакат молия институтлари ўртасидаги ҳамкорликни янада мустаҳкамлаш ва инвестициявий алоқаларни кенгайтиришдан манфаатдор эканини билдирган.

Маълумот учун: China Construction Bank (CCB, Хитой қурилиш банки) — мамлакатнинг етакчи давлат молия институтлари “катта тўртлиги”га кирувчи Хитой ва бутун дунёдаги энг йирик тижорат банкларидан биридир. Банк 6 триллион доллардан ортиқ активларни бошқаради ва бутун дунё бўйлаб кенг тармоқли филиалларига эга.

Олдинроқ Қозоғистонда тўловга қобилиятсиз банклар билан ишлаш қоидалари тубдан ўзгараётгани ҳақида маълумот берилганди. Янги модель солиқ тўловчилар ҳисобидан давлатнинг бевосита молиявий иштирокини истисно этади: бундан буён асосий масъулият ва эҳтимолий зарарларни акциядорлар, инвесторлар ҳамда банк секторининг ўзи ўз зиммасига олади.