Президент 10 ҳафтадан сўнг ўз мамлакатига қайтди

Камерун Президенти Поль Бия 7 июнь куни "қисқа муддатли махсус Европа сафари" деб изоҳланган саёҳатидан сўнг 74 кун ўтиб пойтахт Яундега қайтди. 93 ёшли Биянинг узоқ вақт чет элда қолиши унинг соғлиғи ва давлат бошқарувига оид баҳс-мунозараларни келтириб чиқарган эди.

Камерун Президенти Поль Бия 7 июнь куни бошлаган ва "қисқа муддатли махсус Европа сафари" деб эълон қилинган саёҳатидан кейин 74 кун ўтиб ўз мамлакатига қайтди.

Давлат телевиденияси CRTV Бияни олиб келаётган махсус самолёт Швейцариянинг Женева шаҳридан учиб чиқиб, маҳаллий вақт билан соат 18:00 атрофида Яунде-Нсимален халқаро аэропортига қўнганини жонли эфирда намойиш этди.

Аэропортдан чиқиб кетган Бия уни кутиб олиш учун келганларга машинаси ойнасидан қўл силтаб салом берди. Президент кортежи кейинчалик Президентлик саройига йўл олди.

Президентлик маъмурияти томонидан 7 июнь куни берилган баёнотда 93 ёшли Биянинг қисқа муддатли ташриф мақсадида Европага махсус сафар уюштиргани маълум қилинган эди.

Биянинг эълон қилинган муддатдан анча узоқроқ вақт чет элда қолиши мамлакатда муҳокамаларга сабаб бўлди. Ҳукумат эса аввалги баёнотларида президент чет элда бўлган вақт мобайнида конституциявий ваколатларидан фойдаланишни давом эттирганини таъкидлаган эди.

Мухолиф вакиллар ва айрим нодавлат ташкилотлар Биянинг соғлиғи ва давлат бошқарувига оид янада кўпроқ шаффофлик талаб қилиб чиққан эди. Бу жараёнда мамлакатнинг конституциявий фаолиятига оид мунозаралар ҳам қайтадан кун тартибига чиқди.

Поль Бия Камеруннинг илк Президенти Ахмаду Ахиджо истеъфога чиққанидан сўнг 1982 йил 6 ноябрда конституциявий жараён доирасида президентлик лавозимини қабул қилиб олди.

1975–1982 йилларда бош вазир лавозимида ишлаган Бия 1984, 1988, 1992, 1997, 2004, 2011, 2018 ва 2025 йилларда ўтказилган президентлик сайловларида ғолиб чиқиб, ўз лавозимини давом эттирди.

2008 йилда амалга оширилган конституциявий ўзгартириш билан президентлик учун белгиланган муддат чегараси бекор қилинди. Ушбу ўзгартириш Биянинг қайта номзодини кўрсатишига йўл очиб берди.

Бия 2025 йил октябрь ойида ўтказилган сўнгги президентлик сайловида ҳам ғолиб чиқиб, ваколат муддатини узайтирди.

93 ёшли Поль Бия дунёдаги лавозимидаги энг кекса давлат раҳбари бўлиб қолиш билан бирга, 44 йиллик бошқаруви билан Африканинг энг узоқ муддат хизмат қилган етакчиларидан бири ҳисобланади.