Трамп мигрантларга 7 кун муҳлат берди

АҚШ президенти Дональд Трамп мамлакатга ноқонуний йўллар билан кирган мигрантларга АҚШни тарк этишлари учун 7 кунлик муҳлат берганини эълон қилди.

Душанба куни Трамп, АҚШ Олий судининг ҳукуматнинг Венесуэла фуқароларини “Чет эл душманлари тўғрисидаги қонун” асосида депортация қилиш ҳаракатларини вақтинча тўхтатган қарорини танқид қилди.

Президент Оқ уй ҳар бир шахсни депортация қилиш учун алоҳида суд муҳокамаси ўтказа олмаслигини таъкидлаб, “Чунки буни амалга ошириш, муболағасиз, 200 йил вақт олади,” деди.

Трамп Truth Social’да чоп этган хабарда шундай деди: “Жамоам ажойиб иш олиб бораяпти, лекин ҳар бир қадамда, ҳатто жуда ҳурмат қиладиган АҚШ Олий суди томонидан ҳам тўсқинликка учраяпти. Аммо суд зўравон жиноятчилар ва террорчиларни Венесуэлага ёки бошқа мамлакатларга, ноқонуний йўллар билан бу ерга келган одамларни қайтаришимни хоҳламайдиганга ўхшайди.”

Трамп далил келтирмасдан “радикал сўл”ни суд тизимига босим ўтказишда айблашда давом этди ва уларни спортда ҳакамлар қарорларига таъсир ўтказишга уринувчи одамларга қиёслади. Шу билан бирга, суд тизими ҳар бир мигрант учун алоҳида иш юритиш имкониятига эга эмаслигини таъкидлади.

Трамп қўшимча қилди: “Мамлакатдан чиқаришимиз керак бўлган юз минглаб ноқонуний мигрантлар учун юз минглаб суд муҳокамаси керак бўлади. Бундай нарсани амалга ошириш мумкин эмас.”