Сербия президенти Александр Вучич истеъфога чиқди

Сербия президенти Александр Вучич якшанба куни, 27 сентябрда истеъфога чиқиш тўғрисидаги аризани имзолади.

Вучич Белграддаги президент саройи олдида мамлакат аҳолисига мурожаат қилиб, “кўплаб хатоларга йўл қўйганини” айтди.

“Менга икки бор улкан инсоний ишонч билдирган ва шу орқали инсон эришиши мумкин бўлган энг юксак бурч ва масъулиятни зиммамга юклаган ватандошлардан миннатдорман”, деди у.

Давлат раҳбари вазифасини вақтинча бажариб турувчи шахс Сербия Халқ скупщинаси (парламенти) раиси Ана Брнабич бўлади. Декабрь ойи охирига бориб мамлакатда президентлик сайловларининг биринчи тури бўлиб ўтиши керак.

“Нима учун буни қилдим? Мен сайловларга аллақачон республика президенти сифатида боришим мумкин эди. Ҳатто хорижий давлатлар раҳбарлари бўлган кўплаб дўстларим ҳам мендан ҳайрон бўлиб: ‘Буни нима учун қиляпсиз? Лавозимингиздан нега кетяпсиз?’ деб сўрашди”, деди Вучич.

У бу қарорни адолатли деб ҳисоблашини тушунтирди.

“Жамиятдаги зулм ҳақида тинмай гапирганлар доимо мулоқотдан қочишди. Фикрлар бирлигини қатъият билан ёқлаб чиққанлар ҳар доим фақат шу ҳақда гапиришди ва бошқача ўйлайдиганларни ҳеч қачон тинглашни истамадилар. Мен эса мулоқотни таклиф қилгандим — тўрт-беш йил олдин, икки йил олдин ва бир йил олдин”, деди Вучич.

Вучич ваколатларини топшириш ниятида экани ҳақида 11 сентябрда хабар қилган эди. У АҚШга қилган сафари тугаганидан кейин истеъфога чиқишни режалаштираётганига ойдинлик киритди. Президент Сербия қонунчилигига кўра сайловолди кампанияси бошлангунига қадар ўз лавозимини тарк этиш мажбурияти йўқлигини, лекин бу унинг шахсий қарори эканини қайд этди.

Аввалроқ ҳукмрон Сербия тараққиёт партияси раиси Милош Вучевич Вучич парламент сайловларида партия рўйхатини бошқариши ва унинг бош вазирликка номзоди бўлишини хабар қилган эди. Президентнинг ўзи тушунтирганидек, у сайловларгача истеъфога чиқади, чунки республика парламенти сайловидаги сайловолди кампаниясида “оддий ватандош сифатида” қатнашишни ният қилган.

Александр Вучич 2017 йил 31 майдан бери Сербия президенти лавозимини эгаллаб келаётган эди. 2022 йилда у 2027 йил 31 майда тугаши керак бўлган иккинчи муддатга қайта сайланганди. Сербия Конституциясига кўра, бир шахс икки мартадан ортиқ президент этиб сайланиши мумкин эмас.

Сербияда навбатдан ташқари парламент сайловлари 25 октябрга белгиланган. Уларни ўтказиш тўғрисида 2025 йил декабрь ойида — мамлакатдаги узоқ давом этган норозилик намойишларидан сўнг эълон қилинган эди, намойишчиларнинг асосий талабларидан бири қонун чиқарувчи органга муддатидан олдин сайловлар ўтказиш эди.