Токиода 34 кун кетма-кет ёмғир ёғмоқда

Кузги атмосфера фронти 29 сентябрга қадар кетма-кет 34 кун давомида Токио марказига ёмғир олиб келди.

Нашр Япония метеорология агентлиги (JMA) маълумотларини келтиради. Уларга кўра, бу 1886 йилда статистика юритила бошлангандан бери ҳудуддаги энг узоқ давом этган узлуксиз ёмғирлар давридир. Аввалги рекорд 33 кунни ташкил этган эди — 2019 йил 27 июндан 29 июлгача. Агентликнинг Токио марказидаги кузатув пункти Тиёда туманидаги Китаномару боғида жойлашган.

Агар 2019 йилдаги рекорд ёз бошидаги ёмғирлар мавсумига тўғри келган бўлса, жорий йилда узоқ давом этган ёғингарчиликка Япониянинг асосий Хонсю ороли яқинида жойлашган стационар фронт таъсир кўрсатди. Мавсумий фронтга иссиқ ва нам ҳавонинг такроран кириб келиши, шунингдек, тайфунларнинг яқинлашиши ёғингарчилик миқдори ошишига ёрдам берди.

Токио марказида сентябрь ойидаги ёғингарчилик миқдори 27 сентябрь ҳолатига кўра 621,5 миллиметрга етди, бу ойлик ўртача меъёрдан қарийб уч баравар кўп ва 1958 йил сентябрида ёққан рекорд кўрсаткич — 670,9 миллиметрга яқиндир.

1 дан 27 сентябргача Токио марказида бор-йўғи 45,8 соат қуёш нури қайд этилди, бу кузатувлар тарихидаги энг паст кўрсаткичдир.

Япония пойтахтидан олинган кадрлар пиёдалар соябон остида кучли ёмғир остидан ўтиб кетаётганини, ёмғир суви қатнов қисми ва тротуарларни тўлиқ қоплаганини, автомобиллар эса мураккаб, ҳаддан ташқари ҳўл шароитда ҳаракатланишга мажбур бўлаётганини кўрсатмоқда.

Материалда қайд этилишича, 30 сентябрь куни Токиони ўз ичига олган Канто минтақасида кузги фронт ва бошқа омиллар туфайли яна ёмғир ёғиши кутилмоқда.