Марокаш тарихида илк бор аёл киши бош вазир этиб тайинланди

Марокаш қироли Фотима-Заҳра Мансурийни мамлакат тарихидаги илк аёл бош вазир этиб тайинлади. Мансурий олдида жиддий муаммолар турибди: аҳолининг сиёсий институтларга бўлган ишончини қайтариш, ёшлар ўртасидаги ишсизликни ва ижтимоий тенгсизликни камайтириш.

Марокаш қироли Муҳаммад VI унга янги ҳукумат тузишни топширди.

Бу қарор парламент сайловларидан бир ҳафта ўтиб қабул қилинди. Марокаш ИИВ маълумотларига кўра, сайловларда Мансурийнинг "Автентиклик ва модернизация" партияси Вакиллар палатасидаги 395 та ўриндан 97 тасини қўлга киритиб, биринчи ўринни эгаллаган эди. Партияда мутлақ кўпчилик йўқ, Мансурийни коалицион музокаралар кутмоқда.

Иккинчи ўринни "Мустақиллар миллий иттифоқи" (66 мандат) эгаллади, ундан кейин "Истиқлол" (65), "Адолат ва тараққиёт партияси" (54) ҳамда "Халқ ҳаракати" (29) бормоқда.

Қироллик саройининг хабар қилишича, Мансурий Конституцияга мувофиқ тайинланган ва вазирлар маҳкамасини тузиш учун мандат олган.

Фотима-Заҳра Мансурий ким?

Маълумоти бўйича юрист, 1976 йилда Марокашда туғилган, фаолиятини адвокатликдан бошлаган. Сиёсатга 2008 йилда "Автентиклик ва модернизация" партияси тузилганидан кейин келган. 2009 йилда Марокаш муниципал кенгашини бошқарган — бу лавозимдаги илк аёл, 2021 йилда яна шаҳар кенгаши раҳбари ва Вакиллар палатаси депутати этиб сайланган.

2021 йил октябрь ойидан буён Азиз Аханнуш кабинетида ҳудудий режалаштириш, шаҳарсозлик ва уй-жой сиёсати вазири лавозимида ишлаб келаётган эди. 2024 йил февраль ойида партиянинг жамоавий раҳбариятига кирган ва унинг координатори бўлган.

Мансурий унинг фаолиятига натижаларга қараб баҳо беришларини хоҳлашини, партия эса мамлакатни бошқариш учун зарур билим ва тажрибага эга эканини айтган эди.

Ҳукумат тузилганидан кейин Мансурий 2021 йил октябрь ойидан буён коалицион кабинетни ("Мустақиллар миллий иттифоқи", "Автентиклик ва модернизация", "Истиқлол") бошқариб келаётган "Мустақиллар миллий иттифоқи" етакчиси Азиз Аханнушни бош вазир лавозимида алмаштиради. Энди ғалаба қозонган партия янги ҳукмрон коалицияни тузади.

Асосий вазифалар — ёшлар ўртасидаги юқори ишсизлик, ижтимоий тенгсизлик ва институтларга нисбатан паст ишонч. Сайловларда иштирок этиш кўрсаткичи 38 фоизни ташкил этди — бу сўнгги қарийб икки ўн йилликдаги энг паст кўрсаткичдир.

Сайловолди кампаниясида партия иқтисодиётнинг йиллик ўртача ўсиш суръатини 5 фоизга етказишни (2026 йил учун расмий прогноз 4,4 фоизни ташкил этади) ва ҳукумат фаолияти муддати давомида камида бир миллионта иш ўрнини ваъда қилган эди.