Осмондаги ажойиб медуза кўриниши

АҚШнинг Флорида штатида эрталабги соатларда осмонда пайдо бўлган ва улкан медузани эслатувчи нурли кўриниш ҳайратга сабаб бўлди. Мовий рангли булутнинг манбаи қисқа вақт ичида маълум бўлди.

SpaceX компаниясининг Falcon 9 ракетаси Халқаро коинот станциясига тахминан 2,9 тонна юк ташиш учун Флоридадаги Канаверал бурни Коинот кучлари станциясидан учирилди.

Маҳаллий вақт билан соат 06:33 да амалга оширилган учирилгандан сўнг осмонда улкан медузани эслатувчи порлоқ булут ҳосил бўлди.

NBC6 хабарига кўра, Окала шаҳрида итини сайр қилдириб юрган бир киши осмондаги фавқулодда манзарани суратга олган. Айрим маҳаллий аҳоли вакиллари эса мовий нур ҳақида хабар бериш учун телеканалга қўнғироқ қилишган.

NBC6 метеорологи Челси Амбриз бунга ўхшаш манзаралар ракеталарнинг атмосферада қолдирган чиқинди газлари қуёш нури билан ёритилиши натижасида содир бўлишини тушунтирди.

Ушбу ҳодиса, айниқса, кун чиқишидан сал олдин ёки сал кейин амалга оширилган ракета учирилишларида намоён бўлиши мумкин.

НАСАнинг баёнотига кўра, Falcon 9 ракетаси билан учирилган Dragon коинот кемаси Халқаро коинот станциясига тахминан 2,9 тонна юк ва ускуналар олиб бормоқда.

Юк таркибида янги илмий тажрибалардан ташқари, коинот станциясининг охирги жуфт очиладиган қуёш панеллари ҳам бор.