Рональду “Ювентус”га ўтди

Мадриднинг “Реал” клуби “Олтин тўп”нинг беш бор совриндори, Португалия терма жамоаси ҳужумчиси Криштиан Рональдуни “Ювентус”га сотишга рози бўлди. “Ювентус” Рональду учун “Реал”га 100 миллион евро тўлайди. Рональду «Ювентус» билан 4 йиллик шартнома бўйича келишувга эришиб, унга кўра футболчи йилига 30 миллион евро маош олади.

33 ёшли португалиялик футболчи 2009 йили «Манчестер Юнайтед»дан «Реал»га келганди. Ўшанда мадридликлар футболчи учун рекорд даражадаги 93 миллион еврони тўлашган.

Испан клубида Рональду жами 15 соврин ютди. Жумладан, у 4 марта Чемпионлар лигасида ғалаба қозонган, икки марта Испания чемпионати ғолиби бўлган, икки марта Испания Кубогида, икки марта Испания Суперкубогида, икки марта УЕФА Суперкубогида, 3 марта клублар ўртасидаги жаҳон чемпионатида ғалаба қозонган.