Эрон президенти Трамп билан учрашувдан бош тортди

Эрон президенти Масъуд Пезешкиян "беҳаё Трамп" билан музокара ўтказишга ҳеч қачон рози бўлмаслигини билдирди. Аввалроқ АҚШ Президенти уни тўғридан-тўғри музокараларга чақирган эди.

Масъуд Пезешкиян АҚШ президенти яна Эронга таҳдид солаётганини таъкидлади:

"Агар сиз менга таҳдид қилсангиз, мен сиз билан гаплашмоқчи эмасман. Қўлингиздан келган ҳамма ишни қилинг. Яқинда Зеленскийга нисбатан қилган ишларингиздан уялишингиз керак."

Ислом инқилоби раҳбари оятулло Сайид Али Ҳомайний яқинда АҚШнинг Теҳрон билан музокара қилиш таклифини "обрўсиз ва маъносиз" деб атаган эди.

Шунингдек, Эроннинг Олий раҳбари оятулло Али Ҳомайний Теҳрон ўз манфаатларинигина кўзлайдиган давлатлар билан музокара олиб бормаслигини билдирган.

АҚШ Президенти Дональд Трамп эса Эрон Олий раҳбарига мактуб йўллаб, Эрон ядровий дастурини тўхтатиш бўйича музокара бошлашни таклиф қилганини айтди. Шундан сўнг, америкалик раҳбар Вашингтон Эрон ядровий масаласини ҳал қилиш учун икки йўлни кўриб чиқаётганини – ҳарбий ва дипломатик йўллар, бироқ у музокараларга устуворлик беришини таъкидлади.

Шу билан бирга, Трамп Теҳрон ёки Вашингтон билан келишувга эришиши, ёки яқин вақт ичида оқибатларга дуч келиши мумкинлигини айтган.