Хитой ядровий батареяларни оммавий ишлаб чиқаришни бошлади

Қувватламасдан 50 йил хизмат қилади. Радиоактивлик тарқатмайди ва хизмат муддати тугагач, оддий мисга айланади.

Хитой ядровий батареяларни оммавий ишлаб чиқаришни бошлади. Ушбу технология ҳақида илк бор 2024 йил бошида Betavolt Technology компанияси томонидан маълум қилинган эди. Энди эса ОАВларда хабар қилинишича, радионуклид аккумуляторнинг прототипи оммавий ишлаб чиқаришга йўл олган.

Ядровий батарея — BV100 радиоактив никель-63 изотопига асосланган. У хавфсиз ҳисобланади, чунки парчаланиш жараёнида иссиқлик чиқармайди (портлаш хавфи йўқ) ва охирида барқарор мисга айланади. Батарея ҳеч қандай хизмат кўрсатиш ва қайта қувватлашга эҳтиёжсиз 50 йилдан ортиқ ишлаши мумкин. Ҳозирги, оммавий ишлаб чиқариш учун мўлжалланган варианти 3 вольт кучланиш ва 100 микроватт қувватга эга.

BV100 энергия зичлиги бўйича литий-ион батареялардан 10 баравар юқори. Батареянинг яна бир муҳим устунлиги — унинг ҳароратга чидамлилиги: у −60°С дан +120°С гача бўлган шароитларда муаммосиз ишлайди.

Ягона батареянинг чиқарадиган токи кўплаб замонавий қурилмалар учун етарли эмас. Бироқ унинг модулли тузилиши туфайли бир нечта батареялар бирлаштирилиб, юқори қувват талаб қилувчи қурилмаларда фойдаланиш мумкин. Шунингдек, Betavolt Technology 2025 йил охиригача 1 ватт қувватга эга янги BV100 моделини ишлаб чиқаришни режалаштирмоқда.

BV100 ва унинг қувватлироқ турлари қуйидаги соҳаларда қўлланилиши мумкин:

— тиббий ускуналар,

— микроэлектроника,

— дронлар,

— аэрокосмик технологиялар.

Эслатиб ўтамиз, аввалроқ россиялик физиклар кадмий сульфиди (CdS) кристаллари ва терагерц тўлқинлар ёрдамида маълумотларни узатишни тезлаштириш усулини ихтиро қилгани ҳақида хабар берилган эди.