Тунги ер қимирлаши 600 дан ортиқ одамнинг умрига зомин бўлди

Афғонистоннинг шарқий қисмида кучли ер қимирлаши юз берди: сўнгги маълумотларга кўра, ҳалок бўлганлар сони 600 дан ошди, яна 1300 дан зиёд одам яраланди. Офат 31 август, якшанба куни кечқурун содир бўлиб, минтақа учун катта шок бўлди.

23:47 да магнитудаси 6,0 бўлган тўлқинлар қайд этилди. Ер остидаги ўчоғи атиги 8 километр чуқурликда, Джалолобод шаҳридан 27 километр узоқликда жойлашган эди.

Пойтахт Кобулда ва ҳатто Покистоннинг Исламабод шаҳрида (эпицентрдан деярли 400 км узоқликда) ҳам кучли силкинишлар сезилди.

Ер қимирлаши ортидан юзлаб уйлар вайрон бўлгани ва бутун бошли қишлоқлар ер билан яксон бўлгани ҳақида хабарлар кела бошлади.

Кунар ва Нангархар вилоятларида маҳаллий аҳоли ўз қўллари билан жабрланувчиларни вайроналар остида қутқаришга уринишди.

Вазиятни тоғли ҳудудлардаги кўчкилар янада оғирлаштирди — йўллар ёпилиб қолган. Эпицентрга фақат ҳаво орқали бориш мумкин: душанба тонгга қадар у ерга тўртта ҳарбий вертолёт шифокорлар билан юборилди. Жабрланганлар Жалолобод ва бошқа шаҳарларга олиб кетилмоқда. Ўнлаб ихтиёрийлар маҳаллий шифохоналарда қон топширишмоқда.

Соғлиқни сақлаш вазирлиги юзлаб жабрланувчилар борлигини билдирди ва алоқа йўқлиги ҳамда ҳудуднинг узоқлиги сабабли аниқ рақамлар янада юқорилашиши мумкинлигини огоҳлантирди. Ички ишлар вазирлиги дастлабки рақамни эълон қилди: 610 киши ҳалок бўлган ва 1300 дан ортиқ одам яраланган.

"Баъзи қишлоқлар тўлиқ йўқ бўлиб кетган, аҳолининг бир қисми ҳали ҳам вайроналар остида қолган", — дейилади хабарда.

Фожеа янада оғирроқ тус олмоқда: атиги бир неча кун олдин шу вилоятларда кучли сув тошқини юз бериб, камида 5 кишининг ҳаётига зомин бўлган ва юзлаб уйларни вайрон қилган эди. Ер қимирлаши табиат офатидан қийналган аҳоли учун янги зарба бўлди.

Афғонистон ҳокимияти халқаро ташкилотларга фавқулодда ёрдам сўраб мурожаат қилди. АҚШ Геологик хизмати баҳолашича, йўқотишлар "салмоқли ва кенг кўламли" бўлиши мумкин.

Мутахассислар таъкидлашича, ер қимирлаши жуда ҳам юза чуқурликда рўй бергани сабабли оқибатлари айниқса вайронкор бўлди. Зарар кўрган ҳудудлардаги уйлар асосан хом ғиштдан қурилган бўлиб, бундай силкинишларга чидай олмайди.