Туркистонда Шарқий айланма йўл қурилади

Туркистон шаҳри атрофида Шарқий айланма автомобил йўли қуриш бўйича йирик инфратузилмавий лойиҳа амалга оширилади. Қурилиш ишлари 2025 йил сентябрь ойида бошланиши режалаштирилган.

Лойиҳанинг амалга оширилиши Туркистон вилояти ҳокими Нуралхон Кушеров ҳамда Хитойнинг China Railway Asia-Europe Construction Investment Co., Ltd. компанияси бош директори Чжоу Ҳэйвэй ўртасидаги учрашув натижасида эришилган келишувлар асосида мумкин бўлди. Мазкур компания Қозоғистонда олдин Астана шаҳрида енгил темир йўл (ЛРТ) қурилишида иштирок этган.

Айни пайтда Туркистон маркази орқали Ғарбий Европа – Ғарбий Хитой халқаро трассасининг энг зич қисми ўтади. Бу йўлдан ҳар куни 8 000 дан ортиқ йирик юк машиналари ҳаракатланади. Бу эса шаҳар инфратузилмасига катта босим ўтказиб, йўлларнинг тез бузилиши, тирбандликлар, ҳаракат хавфсизлигининг пасайиши ва аҳолига ноқулайлик келтирмоқда. Шунингдек, шаҳарнинг экологик ҳолати ва туризм салоҳиятига ҳам салбий таъсир кўрсатмоқда.

Шарқий айланма йўл қурилиши транспорт оқимини марказдан четга буриш имконини беради. 30 км узунликдаги янги йўл шаҳар ҳудудининг шарқ томонида қурилиб, Туркистонга кирувчи асосий йўлларни марказий кўчаларни айланиб ўтиб боғлайди.

Лойиҳани амалга ошириш муддати — 1,5 йил. Қурилиш тугаллангач, транзит ҳаракат шаҳар ташқарига йўналтирилади, бу эса шаҳар кўчаларидаги юкламани камайтиради, ҳаракат хавфсизлигини оширади ва экологик муҳитни яхшилайди.

Инфратузилмани ривожлантириш Туркистон вилоятининг устувор йўналишларидан бири бўлиб, ҳудуд сўнгги йилларда барқарор ўсишни намойиш этмоқда. Учрашув чоғида айланма йўл қурилиши Туркистоннинг Қозоғистондаги маънавий пойтахт сифатидаги мақомига ва трансевроосиё коридоридаги стратегик ўрнига мос замонавий транспорт тизимини шакллантиришда муҳим қадам бўлиши қайд этилди.

Суҳбат чоғида томонлар кейинги ҳамкорлик истиқболларини ҳам муҳокама қилдилар. Хитойлик инвесторлар ҳудудда логистика маркази ва янги ишлаб чиқариш майдонлари қуришга қизиқиш билдирди. Улар аллақачон ушбу объектлар учун мўлжалланган ер майдонлари билан танишиб чиқдилар ва Туркистон вилоятининг юқори инвестициявий салоҳиятини таъкидладилар.

Умид қилинадики, бу лойиҳалар амалга ошса, юзлаб янги иш ўринлари билан таъминланиб, кичик ва ўрта бизнес ривожига туртки беради ҳамда ҳудуднинг халқаро инвесторлар учун жозибадорлиги янада ошади.