Трампга яна бир суиқасд

Оқ уй мухбирлари билан учрашувда Трампни нишонга олган ҳужумчининг Коул Аллен экани аниқланган эди. Ҳужумчи НАСАда фаолият юритгани ва “Ойнинг энг яхши ўқитувчиси” унвонига эга бўлгани эълон қилинганди. Алленнинг воқеадан олдин оиласига юборган хабарлари янги баҳс-мунозараларга сабаб бўлди.

АҚШ пойтахти Вашингтондаги меҳмонхоналардан бирида ташкил этилган Оқ уй мухбирлари уюшмаси кечасига уюштирилган қуролли ҳужумнинг АҚШ матбуотидаги акс-садолари давом этмоқда. Америкалик манбаларнинг даъво қилишича, гумонланувчи Коул Аллен (31 ёш) ҳужумни содир этишдан бир неча дақиқа олдин оиласига ёзма хабар юборган ва ўз “манифестини” баён қилган.

Ўзини “дўстона федерал қотил” деб атаган ҳужумчи ўз манифестида ҳужумдан кўзлаган мақсадларини тушунтириб берган. Аллен: “Мен АҚШ ватандошиман. Мени тамсил этувчи шахсларнинг қилмишлари менинг кимлигимни акс эттиради. Мен энди педофил, зўравон ва хоиннинг ўз жиноятлари билан менинг қўлимни қонга бўяшига йўл қўймоқчи эмасман. Очиғини айтганда, бунга анча олдин ҳам йўл қўймоқчи эмасдим, лекин бу борада бирор чора кўриш учун қўлимга тушган илк ҳақиқий имконият шу бўлди”, деган ибораларни қўллаган.

Хабарида ҳужумдаги нишонлари ҳақида ҳам тафсилотларга тўхталган гумонланувчи, Федерал қидирув бюроси (ФҚБ) директори Кэш Пателдан ташқари, маъмурий расмийлар энг юқори лавозимдан энг қуйи лавозимгача бўлган тартибда унинг асосий нишони эканини айтган. АҚШ Махфий хизмати ходимларини зарурат туғилганда нишонга олиши мумкинлигини таъкидлаган Аллен, меҳмонхона хавфсизлиги, меҳмонхона ходимлари, полиция ва миллий гвардия расмийлари ҳамда Оқ уй томонидан ташкил этилган дастур меҳмонлари ҳеч қандай ҳолатда унинг нишони эмаслигини ёзган.

Бундан ташқари, ҳудуддаги хавфсизлик чораларини етарли эмас деб ҳисоблаган гумонланувчи шундай деган: “Ҳар бурчакда хавфсизлик камералари, меҳмонхона хоналарида эшитиш қурилмалари, ҳар 10 метр масофада қуролланган ходимлар ва кўплаб металл детекторлари бўлишини кутгандим, лекин ҳеч нарсага дуч келмадим. Транспортда, меҳмонхонада ва тадбирда ҳеч қандай хавфсизлик йўқ эди. Меҳмонхонага киришим билан пайқаган ягона нарсам – кибр туйғуси бўлди. Ичкарига бир нечта қурол билан кирдим ва у ердаги бирорта одам ҳам менинг хавф туғдиришим мумкинлиги ҳақида ўйлаб ҳам кўрмади”.

Аллен АҚШ Махфий хизматининг “лаёқатсизлигига” маъно бера олмаётганини таъкидлаб: “Бу лаёқатсизлик даражаси ақл бовар қилмас даражада. Масалан, АҚШ ватандоши бўлиш ўрнига Эрон агенти бўлганимда, бу ерга ‘Ma Deuce’ (M2 оғир пулемёти) олиб келишим мумкин эди ва ҳеч ким ҳеч нарсани сезмасди. Бу ҳақиқатдан ҳам ақлга сиғмайди”, деди.

Оқ уй берган баёнотга кўра, гумонланувчининг синглиси Авриана Аллен ҳам расмийларга берган кўрсатмасида акаси тез-тез “бугунги дунёдаги муаммоларни ҳал қилиш учун бирор нарса қилишни режалаштираётгани” ҳақида гапирганини тасдиқлаган.

АҚШнинг CBS телеканалига гапирган манбалар 31 ёшли гумонланувчи Калифорния штатининг Лос–Анжелес вилоятига қарашли Торранс шаҳридан эканини билдиришган. Манбалар Аллен Калифорниядаги “C2 Education” номли хусусий ўқув марказида ишлагани ва 2024 йил декабрь ойида “Ойнинг энг яхши ўқитувчиси” этиб сайланганини қайд этишган.