Мадагаскарда ҳарбий тўнтариш содир бўлди

Мадагаскарда ҳарбий тўнтариш юз берди ва мамлакатдан қочган президентга импичмент эълон қилинди.

Мадагаскар президенти Андри Радзуэлина бир неча ҳафталик оммавий норозилик намойишларидан кейин мамлакатни тарк этган. Бу намойишлар Z авлоди ёшлари ҳаракати ташаббуси билан бошланган эди.

Норозиликлар сув ва электр таъминотидаги узилишлар сабаб бошланди, аммо тез орада улар коррупция ва самарасиз бошқарувга қарши кенг қамровли намойишларга айланди. Намойишчилар томонини армиянинг айрим қисмлари, жумладан, 2009 йилдаги тўнтаришда Радзуэлинани қўллаган CAPSAT элита бўлиниши ҳам қўллаб-қувватлади.

БМТ маълумотларига кўра, полиция билан тўқнашувлар чоғида камида 22 киши ҳалок бўлган, 100 дан ортиқ киши яраланган.

Андри Радзуэлина илк бор 2009 йилдаги ҳарбий тўнтариш орқали ҳокимиятга келган, кейин 2018 йилда президент этиб сайланган ва 2023 йилда қайта сайланган эди. Бир ой муқаддам у намойишчиларни тинчлантириш мақсадида ҳукуматни тарқатиб юборган.

ОАВ хабарига кўра, қочиб кетган президентга нисбатан расман импичмент эълон қилинган. Ҳарбий тўнтариш етакчиси, полковник Майкл Рандрианирина, ёшлар норозилиги натижасида президент Андри Радзуэлина ағдарилганини маълум қилиб, яқин кунларда қасамёд маросими бўлиб ўтишини айтди.

“Расмий қасамёд зарур. Биз бу ерда камида 18 ой, кўпи билан икки йил қоламиз”, — деди Рандрианирина.

Полковникнинг сўзларига кўра, у мажбур бўлган, чунки мамлакатда энди ҳеч нима қолмаган — на президент, на бош вазир, на ҳукумат.

Шундан сўнг Африка Иттифоқи Мадагаскарнинг аъзолигини конституциявий тартиб тиклангунга қадар тўхтатиб туришга қарор қилди. Ташкилот аввал ҳам Мали, Буркина-Фасо ва Гвинеяга нисбатан шундай чора кўрган эди.

Бундан ташқари, БМТ бош котиби Антониу Гутерриш “ҳокимиятнинг конституцияга зид йўл билан алмаштирилганидан жиддий ташвишда эканини” билдириб, барча томонларни “инқироз ва унинг сабабларини тинч йўл билан ҳал қилиш учун ҳамкорлик қилишга” чақирди.