Путин: "Буревестник" жанговар навбатчиликка тайёр" деди

Россия президенти Владимир Путин ядровий двигателли "Буревестник" қанотли ракетасининг синовлари якунланганини ва энди "жанговар навбатчиликка тайёр" эканлигини эълон қилди.

Россия Федерацияси президенти Владимир Путин ҳарбий формада Қўшма кучлар қўмондонлигига ташрифи чоғида ядровий двигателли "Буревестник" қанотли ракетасининг синовлари тугалланганини ва "асосий мақсадларга эришилганини" расман маълум қилди.

Кремль Путиннинг ташрифи давомида стратегик ядро машғулотлари ҳам баҳолангани ва янги қурол синовлари якунланганини билдирди.

Путин синовлари тугалланган "Буревестник" ракетасини "ноёб маҳсулот" деб таърифлади:

"Бу қурол дунёда тенги йўқ, ноёб маҳсулотдир. Синовлар муваффақиятли якунланди ва ракетани армияга қабул қилиш учун тайёргарлик бошланди."

Россия Бош штаби бошлиғи Валерий Герасимов ракетанинг 21 октябрь куни ўтказилган синов парвозига оид техник тафсилотларни ўртоқлашди:

"Буревестник 14 минг километр учиб, 15 соат давомида ҳавода қолди. Лекин бу чегара эмас. Ракета ядровий энергия билан учириш тизимига эга бўлгани учун исталган масофадаги юқори ҳимояланган нишонларга етиб бора олади."

"Буревестник" кичик ядровий реактив двигатель ёрдамида ишлайди. Бу тизим ракетанинг ёнилғисиз, деярли чексиз масофага етиб боришини таъминлайди. Россия манбаларига кўра, ракета АҚШнинг мудофаа тизимларини кутилмаган йўналишлардан айланиб ўтиш учун мўлжалланган.

Ҳарбий экспертларнинг фикрича, Россиянинг ядровий энергияли "Буревестник" ракетасининг масофаси Туркияни ҳам қамраб олишга етади. Ракетанинг чексиз масофага учиши сабабли Қора денгиз йўналиши НАТО доирасидаги стратегик аҳамиятини янада оширмоқда.

Герасимов Украинадаги тўқнашувлар ҳақида ҳам маълумот берди. У Россия армияси Купянск, Красноармейск, Днепр ва Запорожье ҳудудларида олдинга силжишга эришганини таъкидлади. Баъзи шаҳарларда Украина бўлинмалари қуршовга олинганини ҳам билдирди.