Сиднейни қонга бўяган ҳужумчиларнинг шахси аниқланди

Австралиянинг Янги Жанубий Уэлс штатига қарашли Сидней шаҳридаги Бонди пляжида қуролли ҳужум содир бўлди. Гумонланувчилардан бири ўлгани, жароҳатланган иккинчи гумонланувчи эса ҳибсга олингани хабар қилинган эди.

Исроил президенти Ицхак Герцог бу еврейлар жамоасига қарши уюштирилган ҳужум эканлигини айтди.

"Айни дамда Австралиянинг Сиднейдаги опа-сингилларимиз ва биродарларимиз биринчи Ханука шамини ёқиш учун Бонди пляжида йиғилган еврейларга қарши уюштирилган шафқатсиз ҳужумда пасткаш террорчиларнинг ҳужумига учрадилар", — дея Герцогнинг сўзларини Қуддусдаги унинг канцелярияси келтирган.

Маълумот: Ханука — еврейларнинг ёруғлик байрами бўлиб, у ноябр охири — декабр бошларида (Григориан тақвими бўйича) 8 кун давомида нишонланади. 2025 йилда Ханука 14 декабр оқшомида бошланади ва 22 декабр оқшомида тугагайди.

Австралия Бош вазири Энтони Албанезе ўтказган матбуот анжуманида ҳужум еврей австралияликларга қаратилганини айтди. Австралия полицияси Янги Жанубий Уэлс (ЯЖУ) штатига қарашли Сидней шаҳридаги пляжда содир бўлган ҳужумда 16 киши ҳалок бўлгани, 42 киши жароҳатланганини маълум қилди. Бундан ташқари, ҳужумчилар ота-бола эканлиги эълон қилинди.

Дунё Австралиянинг Янги Жанубий Уэлс (ЯЖУ) штатига қарашли Сидней шаҳридаги Бонди пляжида ўтказилган Ханука тадбирида юз берган даҳшатли воқеани муҳокама қилмоқда. ЯЖУ Полиция комиссари Мал Лэньон Австралия Бош вазири Энтони Албанезе билан биргаликда ўтказган матбуот анжуманида ҳужум тафсилотларини ошкор қилди.

Ҳалок бўлганларнинг шахсини аниқлаш ишлари давом этаётгани билдирилган бўлса-да, бу шахсларнинг ёши 10 дан 87 гача эканлиги таъкидланди. Воқеада жароҳатланганлар сони эса 2 нафари полициячи бўлган 42 кишини ташкил этди.

Лэньон шахсни аниқлаш бўйича текширувлар тугаганини ва қўшимча ишга эҳтиёж йўқлигини билдирди.

Ҳужумчилар 50 ёшли ота ва 24 ёшли ўғил эканлигини эълон қилган Лэньон, 24 ёшли ўғил касалхонада даволанаётгани ва аҳволи оғирлигини, отаси эса ҳалок бўлганини маълум қилди.

Лэньон 50 ёшли отанинг рухсатномали қуролга эга бўлганини, унга тегишли 6 та рухсатномали қурол мавжудлигини ва воқеа жойидан ҳам 6 та қурол топилганини айтди.

Бош вазир Албанезе ҳам ўз баёнотида: "Кеча кўрганимиз соф ёвузлик, антисемитизм ва терроризм ҳаракати эди", — деди.

Албанезе ҳужум учун Австралия ҳукуматини айблаган Исроил Бош вазири Бинямин Нетаняхунинг танқидларига "Ҳозир бирлашиш вақти" деб жавоб берди. ЯЖУ Бош вазири Крис Миннс эса ҳужумда ҳалок бўлган 15 кишининг ёши 10 дан 87 гача бўлганини айтди. Миннс ҳужумда 42 киши жароҳатлангани ва уларнинг касалхоналарда даволаниши давом этаётганини билдирди.

Қуролли ҳужумга жасурларча аралашиб, гумонланувчилардан бирининг қўлидан қуролини олиб қўйган Аҳмад ал-Аҳмад Австралия матбуотида асосий мавзуга айланган эди.