Эрондаги намойишларда ҳалок бўлганлар сони 5 минг кишига етди

Эронда қимматчилик сабабли бошланган намойишларда қурбон бўлганлар сони 5 минг нафарга етди. Исмини ошкор қилмаган эронлик амалдор “террорчилар ва қуролли исёнчилар” бегуноҳ эронликларни ўлдираётганини иддао қилди. Бошқа томондан, олинган сўнгги маълумотларга кўра, ҳибсга олинганлар сони 25 минг кишига яқинлашди.

Эронда 2025 йил 28 декабрда иқтисодий инқироз ва қимматчиликка қарши бошланган намойишлар бутун мамлакат бўйлаб ҳукуматга қарши чиқишларга айланиб кетди.

Исми ошкор этилмаган эронлик амалдор ҳукуматга қарши намойишлар давомида тасдиқланган ўлим ҳолатлари камида 5 минг кишига етганини, улар орасида 500 га яқин хавфсизлик ходимлари ҳам борлигини маълум қилди. Амалдор зўравонликларнинг асосий қисми мамлакатнинг шимоли-ғарбий ҳудудларида тўпланганини ҳамда “террорчилар ва қуролли исёнчилар” намойишларда бегуноҳ аҳолини ўлдираётганини даъво қилди.

АҚШда жойлашган Эрон инсон ҳуқуқлари фаоллари (HRA) нодавлат ташкилоти эса намойишларда ҳалок бўлганлар сонини камида 3 308 киши деб эълон қилган бўлиб, қурбонларнинг 22 нафари болалар, 166 нафари эса хавфсизлик кучлари эканини билдирган эди. HRA маълумотларига кўра, намойишлар давомида ҳибсга олинганлар сони 24 266 нафарга етган.

Намойишлар дастлаб Теҳрондаги Катта бозор савдогарларининг иқтисодий талаблар билан кўчага чиқишидан бошланди, бироқ қисқа вақт ичида шаҳар марказларидан мамлакатнинг кўплаб вилоятларига тарқалди. Алоқадаги узилишлар ва интернет чекловлари воқеалар кўламини дунё оммавий ахборот воситаларига етказишда катта тўсиқ бўлмоқда.

Эрон режими намойишларни бостириш учун хавфсизлик кучларини кенг кўламда сафарбар қилган бир пайтда, мухолифат етакчилари ва фаоллар дунё жамоатчилигини ушбу шафқатсиз аралашувни қоралашга чақирмоқда. Баъзи халқаро ҳисоботлар расмий ва норасмий маълумотлар ўртасидаги катта фарқларга эътибор қаратиб, аслида қурбонлар сони анча юқори ва инсон ҳуқуқларининг бузилиши янада оғирроқ эканини таъкидламоқда.